Kum shi bynta ban kynmaw burom ïa ka sngi kyrpang ‘Mother’s Day’ kaba long ha ka 12 tarik u Jymmang, na ka liang ka Women’s Welfare Committee (WWC, Loomkyrwiang Dorbar Shnong, hynnin ka sngi 11 tarik kala pynlong ïa ka prokram ïakynduh lang ha ‘Yungwalieh’ jong ka Dorbar Shnong ha ka jingdonlang u Waheh Shnong ma Lammat-OO Laloo, u Symbood Waheh Shnong ma Daioolang Pakma bad ki dkhot jong ka shnong.
Ïa ka jingïalang la pynïaid da ka Riwanki Laloo, Member WWC Loomkyrwiang, la ïoh ruh ka jingnguhblei na ka Hakanihiwot Lywait, Member WWC Loomkyrwiang, nangta la ïoh sa ka jingïathuh khana shaphang ka jingïaid lynti jong ka Women’s Welfare Committee da ka Kongka Shullai, Chairpeson WWC Loomkyrwiang.
Ha kane ka sngi la ïoh ruh ka jingkren halor ka sngi ‘Mother’s Day’ na ka Samhakani Laloo, Secretary WWC Loomkyrwiang, ha kaba ka kong Yoosarda Najiar, Social Welfare Officer, West Jaiñtia Hills kala pynsngew sha ki longkmie shaphang ki lad jingïarap kiba lah ban ïoh naka sorkar kaba long kyrpang eh naka bynta ki longkmie kiba kha khun bad kiwei de ki lad jingmyntoi ïa ki longkmie.
Ka kong Enity Pakma kawei na kiba la shah pynkup burom ha kane ka sngi haka jingkren kala ai mynsiem ïa kiwei de ki para longkmie, da kaba kitbok kirwiang ïa ka Committee jong ka seng kynthei jong ka shnong ba kan dang lah shuh shuh ban trei ïa ki kam babha ha kiba bun ki liang naka bynta ki khun kynthei hapoh ka imlang ka sahlang bad haka shnong ka thaw.
Shuh shuh ha kane ka sngi la ïoh ïaka jingkren bad ai mynsiem ïa ki longkmie na u Symbood Waheh Chnong Loomkyrwiang ma Daioolang Pakma, ha kaba la don ruh ka jingpynkup burom ba kyrpang ïa ki longkmie kiba la palat ïaka 70 snem ka rta.
La pynshongshit bad pynphuh pynphieng shuh shuh ïa kane ka sngi da ki jingshad, ki jingrwai bad ki jingïalehkai bala shim bynta da ki khun samla bad ki khynnah rit jong ka shnong.
