Ki Balang Khristan kiba don hapoh ka jingkhmih jong ka KJP Assembly kila pynlong ia ka jingrakhe burom ba shitaiew lynter ia ka taiew ba kyrpang jong ki Longkmie hapoh ki Balang bapher bapher jong ka rilum Khasi Jaiñtia bad sha ki ri-thor jong ka jylla Assam.
Ka phang pdeng jong kane ka Taiew jong ki Longkmie kaba 16 jong ka KJP Assembly ka long “Ka Aiom Ka Jingwanjngoh”. Ia kane la pynshong nongrim na ka Baibl katkum ka Gospel u Loukas 19:44.
Ia kane ka jingrakhe la sdang naduh ka sngi nyngkong jong kane ka taiew (11/07/2022) bad la pynkut ia ka mynta ka sngi U Blei (16/07/2022). Hapoh kane ka taiew ki longkmie hapoh ki Balang bapher bapher la kidei ha sor ne ha nongkyndon, kila pynlong ia ki prokram bapher bapher kiba kynthup ia ki jingiakop rwai, jingkop leh drama, ki Singing Festival bad khamtam ki jingiaseng ialap nalor kiwei kiwei de ki prokram.
