Ki bor pynïaid District jong ka West Jaiñtia Hills mynta ka sngi 25 tarik Kyllalyngkot 2023 kila rakhe ïa ka ‘13th National Voters’ Day’, haka jingïalang ba la pynlong ha phyllaw jong ka skul Jawahar Navodaya Vidyalaya (JNV) Mukhla, West Jaiñtia Hills, halor ka phang kaba ong “Nothing like Voting, I Vote for sure”. Ïa ka jingïalang la pynïaid da u bah S. Phanbuh, MCS Assistant Commissioner, Jowai ha ka jingdonlang u kongsan bah Batlang Sohliya, IAS, Deputy Commissioner West Jaiñtia Hills District,u ma M.A. Challam MCS Additional Deputy Commissioner, bah Wankhraw K. Kharbuli MCS Assistant Commissioner, kong H.M.L. Kynta Additional Deputy Commissioners, E.L Warjri ADM, u Principal jong ka skul, ki nonghikai lem bad ki khynnah skul.
Ha kane ka sngi la pdiang sngewbha ruh ïa kisamla na ka thaiñ Mukhla Sohshrieh bad na kiwei de kiba la ïoh thymmai ïa ki Voter ID ban jied ïa ki nongmihkhmat ha kane ka Election MLA ka ban long ha ka 27 tarik u Rymphang 2023. Ha kane ka prokram la don ruh ka jingpynkup burom na ka bynta ka PWD lcon ïa u Ansa Freddy Khlem, katba na ka liang u kongsan bah Batlang Sohliya ha ka jingkren ula pynsngew ïa ka jingdonkam ban rakhe ïa kane ka sngi ‘NationalVater Day’ hapoh ka ri hi baroh kawei, ula ong kane ka dei ka hok jonguwei pa uwei u nongshong shnong ka ri ban pyndep ïa ka kam synshar paidbah. Ula kyntu ruh ïa ki samla kiba dong ïohthymmai ïa ki Epic ba kin long kiba shlur da ka mon laidluid ban jied ïa kinongmihkhmat namar ha ka por ba ki ñion ïa ka shap ki don tang marwei bad ym don mano mano ba ïohi, da kaba kyntu lang ïa baroh ki nongshong shnong ka District ba kin mih shakhmat ban pyndep ïa kane ka jingthep Vote MLA ha ka 27 tarik u Rymphang.
Ha kaba ïadei bad kito kiba don bynta ban pynïaid ïa kane ka Election hapoh ka District u bah Sohliya ula ai mynsiem ba kin pyndep hok ïa ka kamram ba la bynshet ha ki tad haduh ka 6 tarik u March kaba dei ka sngikhadduh jong ka Election hapoh ka jylla, u kyrmen skhem ba ki bor District kin lah ban pynïaid beit pynïaid ryntih ïa kane ka Election.
Na ka liang u bah Wankhraw K. Kharbuli MCS, Assistant Commissioner ula pynsngew khyndiat shaphang ka jingtreikam jong ka Election Commission of India naduh ka snem 1950 katkum ka Constitution ka ri ha ka Article 324 ban pynlong ïa ka Election hapoh ka Ri. Shuh shuh u ong kane kan ïarap ïa ki nongshongshnong ka Ri halor ka hok ban jied ïa ki nongmihkhmat, khnang ban wanrah ïa ka roi ka par ha baroh ki liang. Ha ka juh ka por ula lamkhmat ruh ban pule ïa ka voters Pledge da ka jingïashim bynta lang da baroh kiba la poi sha kane ka jingïalang.
La pynshong shit shuh shuh ïa kane ka sngi da ki jingrwai bad ki jingshad tynrai na ki khynnah skul ka JNV, la don ruh ka jingpyni ïa ka jingkren (message) na u Chief Election Commissioner (CEC) halor ka National Voters Day. Ïa kane ka sngi la rakhe ha kylleng ki Polling Stations jong ki saw tylli ki Assembly Constituencies ka District kiba kynthup ïa ka 1-Nartiang AC, 2-Jowai AC, 3-Raliang AC bad ka 4-Mowkaiaw AC bad la lehburom kumjuh ïa baroh ki nongthep Vote ba thymmai da ki Booth Level Officers.
