U Myntri Rangbah ka jylla u Conrad K Sangma mynta ka sngi ula wan ban iashim bynta lang ha ka jingrakhe jingdap 100 snem jong ka jingai jingshakri ka Jaiaw Presbyterian Higher Secondary School, Jaiaw, Shillong, ha ka ba la iadon lang ruh u Chairman ka Meghalaya State Planning Board u bah Metbah Lyngdoh.
Haba kren ha ka jingialang u Myntri Rangbah ula pynpaw ka jingiaroh ia ka jingtrei shitom jong ki nongialam jong ka skul ba kynthup ia ka Managing Committee, ki nonghikai kiba la long ki nongialam lynti ia ka skul ha baroh kine ki snem kiba la la trei naduh ba sdang seng ia ka skul kaba la nohsynñiang shibun eh ha ka jingkyntiew ia ka pule puthi khamtam ia kito ki khynnah kiba wan na ka longïing longsem kaba kyrduh.
U Myntri Rangbah ula kyntu ruh ia ki nongpyniaid jong kane ka skul ba kin long kiba don ia ka thong bad ka jingiohi jngai na ka bynta kiwei pat ki snem ban sa wan. Ula khot ruh ia ka jingiatrei lang naduh ki dkhot jong ka Balang bad ruh ki khynnah skul kiba la pyndep ia ki jingpule jong ki na kane skul ban buh ia ka thong bad jam shakhmat khnang ban wan kham shajrong ia ka kyrdan jong ka skul ha ka liang ka pule ka puthi.
Haba kren ha kane ka prokram u Sangma ula pynkynmaw ba ka jylla Meghalaya ka don 14,000 tylli ki skul bad palat 55,000 ngut ki nonghikai kaba palat kham bun ban ia kiwei pat ki jylla kiba rit kiba don hapoh Northeast. Ula ong ruh ba ka sorkar jylla la pyllut la kumno kumno Rs.2200 klur ha ka shisnem ha ka dur jong ki kran ai jingiarap sha ki skul bapher bapher hapoh ka jylla.
U la pyntip ruh ba shen ka sorkar jylla kan sa thaw ia ka Education Commission ka ban peit ha baroh ki liang kumno ban pynbha ia ka pule puthi hapoh ka jylla. Ha kane ka jingialang u Myntri Rangbah ula pynbna ia ka kran ai jingiarap ba Rs.20,00,000.00 (Arpher Lak tyngka) na ka Chief Minister’s Special Development Fund na ka bynta ban pynheh shuh shuh ia ka ïing skul.
