Ka ophis Sub-Divisional Officer (Civil), Amlarem Sub-Division West Jaintia Hills District, Meghalayala rakhe ïa ka Meghalaya Day 2026 da ka jingïalang paidbah kaba la long ha ka Conference Hall jong ka Ophis SDO(C), Amlarem. Ha kane ka jingïalang la wan jingïashim bynta baroh ki Sub-Divisional Heads jong ka Amlarem Sub-Division ryngkat bad ki ophisar, ki nongtrei bad ki nongshah khot sngewbha, ban pynpaw ïa ka jingïatylli bad ka jingkular ban bteng ïa ki nongrim kiba la pynlong ïa ka jylla Meghalaya.
Ia ka jingïalang la pynïaid da ka Dr. Kavery Rabha, MCS, Assistant Commissioner, Amlarem, kaba la pynpaw ïa ka jingdonkam ban kynmaw ïa ki jingïarap bad jingïakhun jong ki nongïalam jong ka Hill State Movement bad ka jingïadei bad ka jingïatylli bad jingïatreilang ban pynskhem ïa ka jingïaid jingïeng bad ka jingïaid lynti jong ka jylla.
U Dr. Treemmi Lamare, Lecturer, Dept. of Political Science, Kiang Nangbah Government College, Jowai bad Post-Doctoral Fellow, IIT Delhi, u la ai ka jingkren paidbah.
Ha ka jingkren jong u, u la batai ïa ka jingïaid lynti ka jylla Meghalaya naduh ka por ba ka jylla ka dang don hapoh ka sorkar Assam ba ym pat bynta ïa ka, haduh ba ka jylla ka la ïoh ïa ka jylla jong ka ha ka 21 tarik Kyllalyngkot 1972.
U la pynpaw ruh ïa ka jingdonkam jong ka Sixth Schedule bad ka jingïakhun jong ka Hill State Movement bad pynpaw ba ka jylla Meghalaya ka la ïoh ïa ka jylla jong ka da ka jingïakhun kaba jem.
Ha ka jingkren jong u, u SDPO, Amlarem, u la ong ba ka jingïakhun ban ïoh jylla ka long na ka bynta ban ai ka jingïada ïa ka paid nongshong shnong ka jylla bad u la kyrpad ïa ki paidbah, khamtam ïa ki samla, ban bteng ïa ka jingïatylli, jingïasuk bad jingïatreilang ban kyntiew ïa ka jylla.
Ka Sub-Divisional Officer (Civil), Amlarem Sub-Division, ha ka jingkren jong ka, ka la ong ba ka jylla Meghalaya ka dei ka jylla kaba riewspah ha ki jinglong ka mariang, kam don ka jingïapher jaitbynriew bad ka jingïadei para nongshong shnong. Ka la kdew ruh ïa ki jingthmu jong ka sorkar lyngba ka Mission 10 ban pynlong ïa ka jylla Meghalaya kum kawei na ki 10 jylla ba kiew tam ha ka ri India ha u snem 2032, katkum ka jingthmu jong ka ri Viksit Bharat 2047. Ka la ong ba ka jingïatreilang na baroh ki tnat sorkar bad ki shnong ki dei kiba donkam ban poi sha kane ka thong.
Ka jingïalang la kut da ka jingkren aikhublei da u Anthony Rema, Inspector of Excise, Amlarem Civil Sub-Division.
