Ka District Legal Services Authority (DLSA), West Jaintia Hills District, ha ka jingïatreilang bad ka Jaintia Hills District Bar Association, ka la rakhe ïa ka sngi ka jingioh laitluid ka Ri kaba 79 jong ka sngi laitluid ka Ri, ia kaba la pynlong ha phyllaw ka District bad Sessions Court, Khliehtyrshi, Jowai.
Ka jingrakhe ia kane ka sngi ba kyrpang jong ka Ri, ka la sdang da ka jingpynher ïa ka lama jong ka Ri da u N.A. Khan, District & Sessions Judge-cum-Chairman ka DLSA, ha ka jingïadonlang jong ki Judicial Officer, ki dkhot ka Jaiñtia Hills District Bar Association, ki nongsait aiñ, ki nongtrei jong ka DLSA, ki nongtrei ka District bad Sessions Court bad ka ophis u Prosecuting Inspector kaba la pynbud sa da ka jingrwai ïa ka National Anthem.
U N.A. Khan, u la ai ka jingkren sha ki paidbah, da kaba pynshai halor ka jingkongsan jong ka sngi laitluid da kaba kyntu ruh ïa baroh ban ïai bat ïa ki nongrim jong ka riti synshar paidbah, ka hok bad ban don ka jingiatylli.
Kum shi bynta jong kane ka jingrakhe, la pynlong ruh ka jingmareh Marathon kaba 4 KM ha ka por step, kaba la ioh ka jingïashim bynta da ki paidbah ha ka rta bapher bapher. La pynlong ruh ka jingïakop iatan tyllai (Tug of War), ka jingshad ryngkat ki riam tynrai jong ka thaiñ, ka jingrwai da ka kynhun rwai na Jowai kaba kyrteng Small Town Roots Revival, kaba hap hapoh ka Chief Minister’s Meghalaya Grassroot Music Project, ryngkat kiwei de ki jingiashim bynta.
