Ka Seiñ Kynthai Committee (SKC) Loomïongkjam, Jowai hynnin ka sngi 31 tarik u Lber kala pynlong ïa ka prokram ai jinghikai bad la pynkup burom kumjuh ïa ka kong Delina Khongdup kaba dei ka Member ka National Commission for Women, jong ka sorkar Kmie kaba long shibynta na ka jingrakhe ïa ka sngi ki Kynthei.
Ïa kane ka prokram la pynlong ha ïingdorbar ka Loomïongkjam shi bynta na ka jingrakhe ïa ka sngi kyrpang jong ki kynthei ha shityllup ka pyrthei kaba la tip kum ka ‘International Women’s Day 2023’ halor ka phang kaba ong “DigitAll: Innovation and Technology for Gender Equality”.
Ha kane ka sngi kiba bun na ki nongkren ki la pynsngew shaphang kane ka phang kaba donkam eh ha kine ki sngi jong ka juk saian, ha kaba kum ki longkmie ruh ki don ka bynta ka khraw ban pyndonkam ïa ki bor Technology lyngba ki kor ki bor kiba ïarap shibuh eh ha ka kam ka jam jong ki.
Shuh shuh kila pynsngew ba ka pyrthei mynta kala ïaid ha ryngkat ki kor ki bor Technology kila la pynsuk ïa ki paidbah ha kiba bun ki liang bad kaba ïarap ruh ban pynsted ïa ka kam ka jam bad ban ïoh ki jingtip kloi tang da ki minit ne ki Second.
Ïa ka jingïalang ha kane ka sngi la pynïaid da ka kong Juliana Challam, Chairperson ka Seiñ Kynthai Loomïongkjam kaba la pdiang sngewbha ïa baroh kiba la wan sha ka prokram bad kala pynsngew ruh ïa ki kam ba bha jong kane ka seng Kynthai kaba la noh synñiang shibun hapoh ka imlang ka sah lang.
Ka Delina Khongdup haba ai jingkren ha kane ka sngi kala pynpaw ka jingsngewkmen ban ïadonbynta lang ha kane ka sngi ha ryngkat ki longkmie jong kane ka seng bad ki khun samla ka shnong.
Kala ong la buh kyrpang ïa kane ka phang mynta ka snem ka long halor ka jingkynrei ki kam sniew na ki (Cyber Crime), kumta ban ïada ïa kane ka don ka aiñ katkum ka ‘Information Technology Act 2000”, shuh shuh kala ong kum ki lanot ki lah ban ujor ïa kane lada don mano mano ba shim kabu ïa une ka briew lyngba ki Social Media.
Kiwei de kiba ai jingkren ha kane ka sngi ki kynthup ïa u ma Khroo Lamsalanki Pariat, ma Womlin Pakyntein uwei na ki riew rangbah ka Dong Lomïongkjam, ha ryngkat ka jingdonlang ka kong J. Synnah, District Social Officer, West Jaiñtia Hills nalor kiwei de kiba la shah khot sngewbha.