Ka Jylla Meghalaya kan sa ioh ia ka jingiarap pisa ka ban kot sha ka Rs.47.326 klur tyngka na ka bynta ban pynioh jingiarap sha ki lanot ba la shah ktah na ka jinglynshop mariang jong u snem 2022 hapoh ka National Disaster Response Fund (NDRF).
Ia kane ka song pisa la mang sha ki Jylla ha ka jingialang jong ka High Level Committee (HLC) ba la pyniaid da u Union Home Minister ka sorkar pdeng u Amit Shah mynta ka sngi, hapoh ka jingialam jong u Prime Minister ka ri India u Narendra Modi. Ka HLC kala kynton shuh shuh ia ka jingpynioh pisa sha ka Rs.1,816.162 klur na ka bynta ban iarap sha ki 5 (san) tylli ki Jylla hapoh ka ri kiba la shahktah na ka jinglynshop mariang kum ka jingshlei um, ka jingtwa khyndew bad kiwei de ki jingjulor mariang kiba la jia ha u snem 2022.
Kine ki Jylla ki kynthup ia ka Karnataka ka ban ioh Rs. 941.04 klur tyngka. Ka Assam kan ioh Rs.520.466 klur tyngka, ka Himachal Pradesh kan ioh Rs.239.31 klur, ka Nagaland kan ioh Rs.68.02 klur bad ka Jylla Meghalaya kan ioh Rs.47.326 klur tyngka.
Kham ha shwa ka Sorkar Pdeng kala dep ban pyllait pisa sha ki Jylla hapoh ka State Disaster Response Fund (SDRF) katkum ka jingmang pisa ka sorkar jong u snem 2022-23 kaba la kot shaduh Rs.15,770.40 klur tyngka sha ki 25 tylli ki Jylla bad Rs.502.744 sha ki 4 tylli ki jylla na ka NFDRF. Kane ka jingpyllait pisa kaba mynta ka dei kaba la mang pyntam na kaei kaba la dep ban pyllait ha shwa.
Na ka liang ka Sorkar Pdeng mar sien jia kine ki jinglynshop mariang kala phah wut wut ia ki kynhun jong ka kiba la tip kum ki Inter-Ministerial Central Teams (IMCTs) sha ki Jylla ba don kine ki jingjia ba sngewsih ban ioh lum jingkheiñ halor ka jingduh bad ka jinglut jingsep, khlem da ap shuh ia ka kaiphot ka ban sa pynpoi ne phah da ki Sorkar Jylla.