U Bah Prestone Tynsong, Symbud Myntri Rangbah ka Jylla uba dei ruh u Myntri ba khmih ia ka Tnad Kam Poh ïing, u la ai ia ka jingpyntikna ba ka jingrakhe ia ka Sngi Laitlud (Independence Day) kaba 79 mynta u snem kan long kaba jop bad kaba shngaiñ ha kaba u la dep ban khot ia ka jingialang bad ki DC, SP na kylleng ka Distrik jong ka jylla na ka bynta ban iatai halor ka jingshngaiñ lashai ka sngi ka 15 tarik Nailur.
Haba ai jingkren ha kaba iadei bad ka jingrakhe Independence Day mynta u snem, u Symbud Myntri Rangbah u la ong ba na ka liang ki SP bad DC na kylleng ki Distrik ki la pynpaw ba kan ym don kano kano ka jingjia na ka bynta ban rakhe ia katei ka sngi kaba khraw.
Shuh shuh u la ong ba ka jingrakhe mynta u snem kan long kaba bun briew namar katkum ka kaiphod ha kine ki 2 snem, ka jingtuid ki paidbah ha ki jaka rakhe bapher bapher ka long kaba kham pher ha ki por ba mynshwa. Nalor kata, u la pyntina ba ia ki jingbthah bad ki kyndon la dep ban ai sha baroh bad ki tnad bapher bapher kiba khmih ki la shim khia ha la ki jong ki bynta.
Katba na ka liang u Bah S. Nongtnger, S.P. East Hills u la iathuh ba ka jingpynjur ia ka jingpahara bad ka jingtalasi ka la long bun sngi mynta bad kane kam long tang ha ki jaka sor, hynrei ha khapsor ruh kumjuh. U Bah Nongtnger u la ong ba ka jingtalasi ka treikam ia baroh ki jait kali, kata kynthup ia ki kali shimet bad ki kali kamai ha ka por mynsngi bad mynmiet.
Ha kaba iadei bad ki jaka khappud kiba dei ki jaka kiba kham ioh kabu ki briew na kylleng ki jaka ba ioh rung kum ha kane ka por, u S.P u la ong ba ha kaba iadei bad kitei ki jaka la dep ban iakren bad ki Shipai BSF ki la kloi ban iatreilang na ka bynta ka jingrakhe Sngi Laitlud kaba shngaiñ bad kaba khlem shah pynwit.
