Mynta ka sngi ka 10 Nohprah 2024, u Myntri Rangbah ka jylla u Conrad K. Sangma u la plie ia ka Science Block ba thymmai bad ka jingpynheh ia ka Classroom Block-B jong ka Sngap Syiem College kaba don ha Mawkyrwat ha South West Khasi Hills. Ha kane ka sngi la don lang ruh u Bah Renikton Tongkhar, MLA ka thaiñ bad u Bah Carnes Sohshang, MDC EM ka KHADC.
Ha ka jingkren jong u Myntri Rangbah, u la ban jur ia ka jingdonkam ban bei tyngka ha ki samla namar tang 6 lak ngut ki briew jong ka jylla ki dei kiba la palat ia ka 45 snem ka rta bad kiba sah ki dei ki samla.
U la ong kumno ka pule puthi ka don ka bynta kaba kongsan ha ka roi ka par jong uwei pa uwei u briew bad kaba kut eh ka jingnoh synniang jong ki sha ka jylla bad ka jaitbynriew. U la bynrap ruh ba ha ki kyrdan bapher bapher ka jingpule ka la shah ktah ha ki prokram bapher bapher jong ka sorkar.
“La jan man la ki kyrdan pule, ka sorkar ka la tuklar da kaba thaw ïa ki polisi, ki prokram, ka jingkyrshan ha ki jingtei bad jingkyrshan ha kaba ïadei bad ki kam ba la shah pynjari ha kaba nga sngewkmen ba ka kolej jong phi ruh ka dei ka bynta jong kane ka sngi,” u la ong.
U Myntri Rangbah ka jylla u la pynbna ruh lyngba ki rai ba la shim na ka jingialang jong ka kynhun Myntri kaba la long hynnin ka sngi, ba yn sdang noh ia ka Science bad Commerce stream ha ki phra tylli ki kolej sorkar kiba don ha ki bynta bapher bapher jong ka jylla kata ha Sohra, Mawphlang, Williamnagar bad Baghmara.
“Kam long kaba dei hok ba ki samla pule kim lah ban jied ia ki sobjek kiba ki kwah ban pule, bad kumta ka dei ka jingpyrshang jong ngi ban pynthikna ba ngi lah ban ai ia ki lad kiba donkam na ka bynta ki samla pule ban jied ia ka laiñ kaba ki kwah ban pule katkum ka jingdonkam da ka NEP,” u la ong.
Shuh shuh u la ong ba ka dei ka jingpyrshang jong ka sorkar ban ai ka lad kaba kham jylliew ia ka jingjied ia ki sobjek na ka bynta ki samla pule ba kin pyntbit bad pyntip ba ka sorkar ka dang trei ban pynrung ia ki stream jong ka Science bad Commerce ha ki kolej bapher bapher ha ka jylla ban sdang na ki kolej sorkar bad nangta sha ki kolej jong ki riew paidbah.
U Myntri Rangbah ka jylla u la pynbna ruh ia ka jingmynjur ia ka bus skul bad kumjuh ruh ia ka jingnoh synniang kaba 20 lak na ka bynta ban kyntiew ia ka kolej.
