Ha ryngkat lang bad ka Ri hi baroh kawei, ka jylla Meghalaya, mynta ka sngi ka la rakhe ia ka jingdap 77 snem ka jinglaitluid ka Ri India ha baroh kawei ka jylla. Ha nongbah Shillong, u Myntri Rangbah ka Jylla u Conrad K. Sangma u la pynher ia ka lama ka ri bad shim ruh ia ka Salute jong 18 tylli ki kynhun Parade kiba kynthup ia ki BSF, CRPF, MLP, Tripura State Rifles, Unitarian Hr. Secondary School, Puriang, Holy Cross Secondary School, Nongmensong, Nongrah Secondary School, Nongrah, NCC boys and girls, Meghalaya Bharat Scouts and Guides, Laban Presbyterian Hr. Secondary School, Little Flower Secondary School, Seven Set Hr. Secondary School, BSF Sr. Secondary School, Auxilium Girls Hr. Secondary School, Brookside Adventist Hr. Secondary School, Horse contingent of Assam Rifles Higher Secondary School bad ka kynhun ki nongput (Band) jong ka Border Wing Home Guards.
U Myntri Rangbah ka jylla u la ai ruh ia ka khusnam “ Arts and Craft Villages Award” sha kito kiba tbit tam eh ha ka jingpyrshang jong ki ban oh shrong ia ki dur ki dar, ban pynwan dur ia ki jing dro jong ki ban pynitynnad, kiba thoh ban pynwan dur ia ki kynja drama ne phlim, kiba shon ia ki dur(Photography) kiba kynsai bad itynnad bha kiwei kiwei ban bteng kiba iai bteng ban noh synniang da ka sap ka phong jong ki ban iada, ban pynneh bad kyntiew ia ka rukom oh dur oh shrong ia ki jingtei jingsat da uba rim uba jah bad ia ka jingioh pateng ka jylla, la ai khusnam ruh ia ka shnong Wahkhen kaba hap ha East Khasi Hills District na ka bynta ka jingdon jong ka ia ki tiar tem tiar pur hyndai bad ki nongput nongtem, bad ka jingioh pateng ia ka sap ban shna dur shna dar da ki siej, la ai khusnam ia ka Shnong Larnai, kaba ha West Jaintia Hills District kaba la pynneh pynsah ia ka rukom shna ban pynwan dur ia ki khiew khyndew ba la shna da ka ktieh, ia ka shnong Pahambir kaba ha Ri Bhoi District na ka bynta ki jingrwai tynrai jong ka, ia ka shnong Tangman kaba hap ha Eat Khasi Hill na ka bynta ka jingtbit ban shna ia ki shylliah siej, ka shnong Mairang kaba ha Eastern West Khasi Hills district kaba la ioh nam kum ka jaka pdeng kaba bun tam eh ki briew kiba don ia ka sap ka phong ha kan shna bad oh dur oh dar da ki maw, ki dieng, ban pynwan dur bad dro ia ki jingdro kiba itynnad bad ka shnong Amindagre kaba don ha West Garo Hills kaba syriem kum kawei ka jingtei kaba don ia ki jingoh dur da ki dieng bad na ka bynta ki jing shna ba bun jait kiba da ki dieng bad ki maw.
U Myntri Rangbah ka jylla u la ai ruh ia ka khusnam “State Literary Award” na ka bynta u snem 2010 sha I (L) Rev Dr. Iarlington Kharkongor na ka bynta ka kot kaba i la thoh “Ka Nongrim ban tei bad tehsong ia ka iing ka sem ka Ri bad Jaitbynriew” Bad ia u (L) B.S. Bongshall na ka bynta ka jingthoh jong u ia ka kot “Sonajing” . Ia ka “State Literary award” na ka bynta u snem 2011 la ai sha i (L) Dr, J.S. Shangpliang halor ka kot kaba i la thoh “Ka Khet” bad i Lwellyn R, Marak na ka bynta ka kot “Pagitchamrangni Agana” na ka bynta ka ktien Garo.
Ha katei ka sngi la sam ruh ia ki prize sha ki nongjop kiba la ia shim bynta ha ka March Pass ha kane ka sngi rakhie ia ka jinglaitluid ka Ri ha kaba ka skul Holy Cross Secondary School, Nongmengsong ka la ioh ia ka prize ba nyngkong (1st prize). Kiba la ioh ia ka Runners up prize ki long, Ka Brookside Adventist Hr. Secondary School ka la ioh ia ka 1st Runners up bad ka Nongrah Presbyterian Secondary School ia ka 2nd Runners up.
I Deputy Commissioner, ka East Khasi Hills District i Kong R.M. Kurbah i la ai ia ka Khusnam “Kayakalp Awards” na ka bynta u snem 2022-23 kum ka Best District Hospital and Eco-friendly Hospital, sha ka Ganesh Das Government MCH Hospital, Shillong, ia ka Commendation Award na ka bynta baroh ki district la ai sha ka Civil Hospital Shillong, Best CHC and Eco-friendly Award la ai sha ka Sohra CHC, Commendation Award for CHC la ai sha ka Mawphlang CHC bad ja Sohiong CHC. Ia ka khusnam nongjop bad ba wan baar ha ka HWC-SC la ai sha ka Thynroit HWC-SC bad Thangsning HWC-SC, ka Commendation Award na ka bynta ki HWC-SC ka leit sha ka Kharang HWC-SC bad ka Umsohsun UPHC ka la ioh ia ka Commendation Award for UPHC. Ka Megha Health Insurance Scheme(MHIS) bad ka Pradhan Mantri Jan Arogya Yojana(PMJAY) ka la shem ba kiba bun kiba ioh jingmyntoi ha ka liang ka koit ka khiah ka dei ha East Khasi Hills District. Kine ki jingmyntoi ba ha ka jingioh na ka koit ka khiah ki kynthuh ia ka Diengiei PHC kiba hap hapoh ka thup ki PHC, Bansara Eye Centre kaba hapoh ka thup jong ka Eye Care Hospital bad ka Dr. H. Gordon Roberts Hospital kaba hap hapoh ki thup jong ki jaka sumar shimet.
Ka tnat trei kam ka sorkar jylla ka District Social Welfare kaba ha East Khasi Hills District ka la ai ia ka khusnam “DSWO Award” sha i kong Saduka Rangad, iba long i Probation Officer, Special Home, Boys, Mawkasing, New Shillong ban pynpaw ia ka jingiaroh ia ki kam kiba i la trei borbah bad ia ka jingaiti len lade jong i ban trei khlem tyngkai ban pyndep ia la ka kamram.
