Ka kynhun ialehkai phutbol ka Jylla (senior) hapoh ka jingialam jong u coach Hering Shangpliang ka la mih mynta ka sngi na ka Jylla ban leit ïashim bynta sha ka lympung Subroto Cup ka ban sa long ha Nalbari, Assam.
Ka Meghalaya Football Association (MFA) ha ka jingdon ryngkat u President Hamlet Dohling, Vice President Cliff Nongrum, General Secretary Sunesh Syiem bad kiwei kiwei, hynne ka sngi ki la iakynduh bad kitei ki 22 ngut ki nongialehkai ban ai mynsiem bad pynshlur ia ki ha shwa ba kin mih na la ka Jylla. Na ka liang ka MFA ka kyrmen ba kane ka kynhun kan ioh ia ka jingjop bad kumba ki la sakhi ba la dep ban jied ia ki snar ïalehkai kiba tbit, khlem artatien kin wanphai ïing ryngkat bad ka khusnam.
“Ban peit ia ka kynhun, nga tip ngi don ia ka lad kaba khlaiñ. Kane kadei ka kabu ia phi ba phin wanrah ka burom ia ka Jylla bad ngi ka MFA ngi don shibun ka jingkyrmen na phi” ong u Bah Dohling.
Kum ban shu pynkynmaw, ia ka lympung Meghalaya State League (MSL) la pynsangeh shipor namar ka jingdon jong kane ka lympung ha Assam namar bun na ki rangialehkai MSL kidei kiba don bynta ha kane ka kynhun ban leit ïakhun sha Assam.
Ka Meghalaya ka la shah kynthup ha ka group E bad kan sdang ia ka jingiakhun pyrshah ia ka Arunachal Pradesh ha ka 20 Tarik Naiwieng bud pat ka jingiakhun pyrshah ia ka Nagaland ha ka 22 bad pyrshah ia ka Assam ha ka 24 Tarik.