Mynta ka sngi da ki hajar ngut ki paidbah ryngkat ki ummat kthang jong kiba haïing hasem la wan ban pyndep ïa ka leh ñiam ba khatduh ne jingleit on tep ïa ki saw ngut shi ïing kiba la khlad noh ha ka jingjia twa khyndew hynnin ka miet.
Kumban pynkynmaw ba kane ka jingjia ba sngewsih kala ngat ha ka longïing jong ki tei ki saw ngut kiba dei ka kmie u kpa bad ar ngut ki khun ba dnagrit ha ka shnong Pynthor Langteiñ jong ka West Jaiñtia, na ka daw jong ka jingther palat u lap bah ha kaba ka kyndew kaba la btuid na rud jong ka ïing ka jong ki ka la ïoh ban ngat ha ki bynta ka kamra thiah jong ki.
Kine shi ïing shi sem kiba la ngat ha kane ka jingjia ki kynthup ia u kpa u ma (L) Biangki Phawa 29 snem, ka kmie ka kong (L) Pynjanai Rynkhlem, u khun ba heh u Edfify Ryngkhlem 5 snem ba dang pule ha ka klas Arit bad ka khun khatduh ka Vladaroi Ryngkhlem kaba dang 3 snem ka rta.
Mynta ka sngi hashwa ban leit on tep ïaki la don ka jingleh niam bakhaduh kaba la pyïaid da u Rev K. Dkhar ha ka jingïadonlang u Waheh Shnong u ma Army Lipon, ki Tymmen Basan ka Balang Presbyterian Pynthorlateiñ ki nongshong shnong ki nonghikai bad ki khynnah skul jong ka skul u Edify Ryngkhlem.
Na ka laing u Waheh Shnong uba dei ruh u nonghikai ha ka Government skul jong ka shnong ba pule u Edify, u la ïathuh ba u Edify u dei u khynnah uba tip sngi bha bad u ba don ka akor ka burom kaba kham pher, u la ïathuh ba marsien lait na skul u mareh sha ka jaka trei ka kmie u kpa jong u ban rah ja sngi kumjuh ban ïarap lang ïa ki ha ka kam ba ki trei.
