Ki bor District jong ka West Jaintia Hills District ryngkat ki kynhun kiba kynthup iaka Khooid ia ka Wah Myntdu, ka Synjuk ki Waheh Shnong Jowai, ka Synjuk ki Waheh Shnong Jaintia, ka Jaintia Fishing and Environment Protection Association (JFEPA), ka Jowai Municipal Board (JMB), ki officer jong ka tnat Urban, hynne ka step kila leit ban jurip ia ki nala ne ki nur um kiba la tip kum ki In-Situ Nala kiba la pynshna da ka JMB, kumjuh ruh ia ki rud jong ka Wah Myntdu.
Kane ka jingjurip ka long ruh shi bynta ban pyn sangeh ruh ia ki nongtih maw tih shyiap, ki nongsait jain, sait kali bad kiwei de ki jingpynjaboh ne pynsniew ia ka wah Myntdu. Ha ka jingiadei bad kane ka jingiada na ki jingjaboh bad jingpynsniew dur ia ka wah Myntdu na ka liang uwei na ki rangbah ka sor Jowai u ma S. Laloo u la dep ruh ban ujor ia kane sha ka NGT. Haka jingiadei bad ki nongtih maw tih shyiap bad saitjan sait kali harih ka wah, na ka liang ka bor District WJHD kala dep ruh ban pynjari da ka kyndon ain 144.Crpc.
Ha ka jingiadei bad ki nala kiba la shna ha ki wah duid kiba tuid sha ka wah Myntdu kiba mih na kylleng ki shnong ki dong jong ka nongbah Jowai, la lap ba ka jingpyntrei ka la long kaba iaid beit. Ka jingshna ia kine ki In-Situ Nala ka long ban iada ia jinghap ne wan jong ki nuit ki jaboh sha ka Wah Myntdu, da ka jingdon kine kan iarap haduh kumba 80% ia ka jingioh lad ki nuit ne ki jakhlia ban hap ne tuid beit beit sha ka Wah.
Na ka liang ka JFEPA kala dawa ruh ban pynshitom ia ki nongtih bad nongkit shyiap kit maw kiba ka Association kala mynta ka sngi.
Ha kane jingjurip na ka liang ki bor District la don u ma M.A. Challam, ma D. Pde Prsident JFEPA, ma K.L Pariat Chairman Khooid ia ka Wah Myntdu, ma Riquma Laloo General Secretary Synjuk Waheh Shnong Jowai, ma Alan Ningti Prsesident Synjuk Waheh Shnong Jowai, ma Hunbait Pasah officer JMB, ma Bishar Shylla Secretary Synjuk Waheh Shnong Jaintia bad kiwei.