Ka ophis jong u District Social Welfare Officer, West Jaiñtia Hills ha ryngkat ka jingïatrei lang bad ka District Legal Service Authority, Khliehtyrshi, WJHD, ki la pynlong ïa ka jingrakhe ïa ka International Day of Persons with Disabilities ha kane 3 tarik mynta u bnai, ia kaba la pynlong ha ka shnong Barato West Jaiñtia Hills, ia kaba la buh halor ka phang “Fostering disability-inclusive societies for advancing social progress”.
Ïa ka jingïalang la pynïaid da u Pastor H. Lyngdoh, uba dei u Secretary ka Socio Economic Life Development Society, Mowkaiaw. Ha kane ka sngi haduh kumba 100 ngut ki briew ki la ïashim bynta ha kane ka prokram.
La pynlong ruh ïa ka medical check-up bad la pynlong ruh shi bun ki jingialehkaisportsna ka bynta ki briew ba don jingduna ha ka met ka phad.
Haba kren halor ka jingkordor kane ka sngi, u ma F. Shadap, Block Development Officer, Laskein C&RD Block, ula ai mynsiem ïa ki briew ba don jingduna ha ka met, ba kim dei ban shah pynjah burom ne shah leh shiliang. U la kyrpad ba dei ban ai mynsiem, ai jingkyrshan bad pynthikna ïa ka bha ka miat jong ki bad ban pynneh ïa ka jingialong para briew ha ka imlang sahlang.
Ka kong Y. Najiar, District Social Welfare Officer, Jowai ha ka jingkren, ka la batai shaphang ki skim sorkar bapher bapher kiba la buh kyrpang na ka bynta ki PwDs lane ki briew kiba don ka jingduna ha ki dkhot met.
U Samely Ksoo, Para Legal jong ka One Stop Centre; u F. Passah, Assistant Legal Aid Defence jong ka District Legal Service Authority bad ka kong Aidem M. Kassar, Clinical Psychologist cum Manager jong ka District Resource Centre on Disability Affairs (DRCDA), Civil, Jowai ki la batai bniah shaphang ki hok jong ki briew ba don jingduna ha ka met.
La sam ruh ïa ki prize bad ki gift sha ki briew ba don jingduna kum shibynta jong ka jingrakhe. Katba u Heipormi Laloo, Supervisor jong ka District Social Welfare Office, West Jaiñtia Hills District, Jowai, u la ai ruh ïa ka vote of thanks ban pynkut ïa ka jingïalang.
