Ka Bouncer Association of Meghalaya (BAM) Jaiñtia Hills mynta ka sngi Saitjaiñ 27 tarik u Naitung, 2024 kala ïoh ban pynkup burom sa 18 ngut ki samla 2nd Batch kila pyndep pura ïaka jingshah hikai ban long kum ki ‘Security’, napdeng kine 12 ngut ki kynthei bad 6 ngut ki shynrang.
Ïa ka jingïalang pynkup burom ïa kitei ki 18 ngut la pynlong ha Infinity Conference Hall, Mooralong, Jowai bala pynïaid da u Chairman ma Jasmin Dkhar President incharge East Jaiñtia Hills haka jingdonlang u ma Dayooki Sumer kum u Kongsan, ha ryngkat u symbud kongsan ma Pynioolad mi Pala, u Dr. B. Desire Kynjing, u President ka BAM-JH ma Yoosar Kynjing lem bad ki dkhot ka Association.
Na ka liang jong ka BAM-JH kala dep ban ai jinghikai (Training) ïa kitei ki samla ha ki bynta bapher bapher jong ki rukom kilan met nalor ki rukom ai jingpahara ha kino kino ki jaka, ha ka juh ka por kin long ruh ki nongïarap ba ha khmat eh ban wanrah ïa ka jingshongsuk shong shngaiñ hapoh ki shnong ki thaw.
Ha kane ka sngi la sam bad pynithuh ïa kitei ki samla bala dep shah hikai da ki Syrnod jong ka Association ha kaba kin ïoh ban apply ïa kino kino ki kam ki jam bad napdeng kine kin long kum ki dkhot jong ka BAM-JH.
Na ka liang u kongsan ma Dayooki Sumer ha ka jingkren ula ai ka jingïaroh ba kyrpang eh ïa u nongseng jong ka Association uba long ruh u President jong ka ma Yoosar Kynjing uba don shisha ka mynsiem trei shitom ban wanrah kum kane ka kynhun ban pynïoh kam ïaki khun samla bad uba kloi ban ïarap ïa ki samla kiba don ïaka sap ka phong ha kino kino ki bynta ba kin nang kiew shaphrang.
Shuh shuh ula kyntu kum ki briew ki dei ban don ka mynsiem ba sbun ha ka jingim bad ban ai jingtip lem sha kiwei, da kaba ong “ym dei ban hun tang halade hynrei dei ban ïarap ban ai jinghikai lem ïa kiwei”.
Ula ai ruh ka jingkyntu ïa ki samla kiba la dep shah hikai ban kin shim ïa kane kum ka sien jam kaba nyngkong jong ka jingïaid lynti ha jingim jong ki bad ula kyntu ba kin trei shitom shuh shuh katba dang mih ki sngi.
Kiba bun na ki nongkren kila ai ka jingkitbok kitrwiang ïa kitei ki samla 2nd Batch kiba la dep shah hikai hapoh ka jingkhmih jong ka ïa ka BAM-JH, da ka jingkyrmen skhem ba kin ïoh ïa ki kam ki jam jong ki.
La pynshong shit shuh shuh ïa kane ka sngi da ki jingshad tynrai na kitei ki samla ba la dep ban shah hikai, la pynkup burom ruh ïa ki saw ngut ki Supervisor jong ka Association ki ban ïarap lem ban ai jinghikai ïa ki samla ha ka jaka training ka BAM-JH.
Ïa ki kyntien pdiang burom ha kane ka sngi la ïoh na ka Pretty Lyngdoh kaba dei ka Supervisor Training BAM-JH, katba ïa ki kyntien ai khublei la ïoh na u Mephrangki Suiam uwei na ki dkhot jong ka Bouncer.
