[Representation Photo]
U District Magistrate (DM) jong ka West Jaintia Hills District u Abhinav Kumar Singh, IAS ula pynjlan shuh shuh ia ka Curfew miet kaba la pyntreikam baroh shi katta ha ki bynta khappud bad ka ri Bangladesh.
Kane ka hukum thymmai kala pynjlan ia ka por naduh ka 6:00 PM haduh ka 5:00 AM, katba ka hukum barim ka long naduh 8:00 PM haduh 6:00 AM, kaba la pynjlan sha ka 3 kynta.
U DM ula iathuh ba la hap ban pynmih ia kane ka hukum thymmai namar ba ka jinglong jingman ha ki bynta khappud jong ka District bad ka ri Bangladesh kam pat shong shngaiñ. Ula iathuh ba ki bor pyniaid District kila ioh khubor bad ka dang don ka jingiarung iamih jong ki kynhun riew kieng atiar, ki nongkhaii tuh bad ka jingrung beaiñ jong ki briew ha ki bynta khappud.
Kumta ban khanglad ia kine kiei kiei baroh bad ban wanrah ia ka shongsuk shong shngaiñ u DM ula pynjari da ka kyndon 163 BNSS ha baroh shilynter ki bynta khappud, 200 metre na u Zero Line (International Border).
Kane ka hukum ka khang pyrshah ia ka jingiaid ki briew sha ki bynta khappud ba thmu jam sha shiliang pud. La khang ia ka jingialum briew kaba palat ia ka 5 ngut, la khang ruh ia ka jingrah ia ki tiar pynmynsaw kum ki suloi, ki dieng ne ki maw. La khang pyrshah ruh ia ka jingiakhaiituh ia ki mar ba kynthup ia ki mrad, ki tiar ba long beaiñ, ki kwai, ki sikret bad kiwei de.
La pyntip ba kane ka hukum kala treikam noh naduh ka 30 tarik u Nohprah 2025 bad kan bteng tad haduh ban da pynmih da kawei pat.
