Ka jingthang ia ki tynshop jong ki nongialam sorkar kala pur mynta sa sha Ri Lum Jaiñtia bad mynta ka janmiet ki san tylli ki sengbhalang hapoh ka thong “Save Hynynniewtrep Mission”, kiba kynthup ia ka JSM, HYC, EJNC, CoRP, bad HANM, kila thang ia ki tyngshop dur jong u Amit Shah, Home Minister ka sorkar Pdeng, u Himanta Biswa Sarma u Chief Minister ka Assam bad ka jong u Conrad K. Sangma u Chief Minister ka Jylla Meghalaya. Kane ka jingthang ka long kum ka dak ban pynpaw ia ka jingpyrshahjur bad ka jingsngewdiaw halor ka jingshah siat iap ki san ngut ki briew jong ka Meghalaya ha ki Pulit bad nongpahara khlaw ne Forest Guard jong ka jylla Assam, kaba la jia ha ka 22 tarik mynta u bnai.
Ia kane ka jingthang ia kine ki tynshop la pynlong ha jan ka Thanad ka PS Jowai, Iawmusiang, ha kane ka janmiet na baroh ki nongialam jong kitei ki seng kila pynpaw ka jingpynrem jur ia ka jingleh donbor jong ki pulit Assam bad pynrem ruh ia ka jingbymlah ka sorkar Meghalaya ban tehlakam ia ka jingiakhajia khappud hapdeng ka jylla Meghalaya bad Assam kaba la neh mynta la 50 tylli ki snem.
Shuh shuh na ka liang ki nongialam seng kila pynrem jur ia ki Pulit bad ka jylla Meghalaya kiba nud ban ia shrut ne pynibor tang hapoh ka jylla la jong hynrei sha ki jaka khappud ki kim nud ne ki long tang ki khawpud bad ia kane la iohi bad shakhi ha kine ki jingjia kiba la dep ha shnong Mukroh, West Jaiñtia Hills.
