Ka Orphan Children Foundation hapoh ka jingïalam jong u Founder Chairman u bah L. Dkhar ka la ioh ka lad ban bteng ai jingïarap da ki marbam bad bai skul ïa ki khynnah Khunswet ki ba don ha Wapung Shnong East Jaiñtia Hills.
Ha kane ka sngi la ïa don lang ruh u Office Secretary OCF East Jaiñtia Hills District u Samla E. Dkhar bad ka jingïadon lang ka Volunteer na East Jaiñtia Hills ka kong R. Sungoh, ha ryngkat kiba ha ïing hasem jong kine ki khynnah.
Haba ai jingkren u Founder Chairman ka Orphan Children Foundation Jaiñtia Hills District u bah Dkhar u ong ba ka Foundation hi ka kloi ban ïarap ïa ki khunswet ha kano kano ka por ba ki don kam jingïarap bad ula ong ruh ka Foundation ka dei na ka bynta jong ki khunswet bad ki lah ban phone sha ki Volunteer jong ka Foundation ha kano kano ka por ba ki don kam jingïarap khamtam ha ka por ba ki pang ki shitom.
La ïathuh wat lada ka Foundation ka ïa kynduh shibun ki jingeh hynrei ka Foundation ka kular ban ïaid sha khmat ban bteng ïa ka jingïarap sha kito ki khynnah khunswet da ki marbam, ka bai skul bad khamtam ha ka por ba ki pang ki shitom hynrei ka Foundation kam lah ban shimti ïa ki namar kim pat don ïa ka Orphanage Centre, hynrei wat la kata ruh ka Foundation kan ïaid beit sha khmat ban bteng ïa ki jingïarap bad da ka jingkyrkhu jong U Blei ka Foundation kan nang ïai bteng shuh shuh ïa ka jingïarap sha ki khynnah Khunswet kiba donkam shisha ïa ka jingïarap.
Haba pynkut ïa ka jingkren u bah Dkhar ula ai mynsiem bad u la kyntu ruh ïa kine ki khynnah ba kim dei ban duh mynsiem wat la da kim don kmie ruh hynrei U Blei u don ryngkat bad ki u ba la kyntu ruh ba kin ïaid sha khmat ha ka jingpule namar ka jingnang jingstad ka long ka waitlam na ka bynta jong ki.