Ka Hynniewtrep Integrated Territorial Organization West Jaintia Hills District mynta ka Sngi ka 28 tarik Nailar 2023 hapoh ka Jingialam u President u samla Wanbiang Pulang ki la leit ban tah iaki jingthoh ha kylleng ka sor Jowai bad sha kiwei kiwei ki bynta jong ka West Jaintia Hills District ban buh ka jingmana ia baroh ki dukan hardware kiba die cement ban nym die shuh iaka Topcem Cement tad haduh ban da lah ba pynbeit ia ki jingkulmar kiba mih haka 24 tarik ka Sngi pynlong public hearing katei ka cement company.
Lah ban kdew ba ka tei ka jingiakynad ka jia hadien ba kynshoit ki nongtrei jong ka tei ka Kharkhana shna Dewbilat kaba don haka shnong Thangskai, East Jaintia Hills District. Kane ka jingkynshoit jong kitei ki bar jylla kala pynbitar ia ngi kum ki para dkhot jong ka jaitbynriew Hynniewtrep hi baroh kawei bad ka pyni ba ki bar jylla kila sdang ban leh trai bad sngewtrai ha ka ri jong ngi bad lada kum ki nongshong shnong kiba don ka jingkitkhlieh na ka bynta ka lawei jong ka ing ka sem ka kur ka jait kumjuh iaka ri bad ka jaitbynriew ngi dei ban iasnoh kti lang ha kane ka jingpyrshah jong ka seng ban thied bad pyndon kam iaka Topcem Cement ha baroh ka bri u Hynniewtrep bad lada don kino kino kiba dang thied bad pyndon kam ia katei ka cement ka pyni maki ruh ki iasnoh kti lang bad kitei ki bar jylla ban leh ia katei ka kam kaba long ka jingiuhroit bad thombor ia ki paradoh para snam jong ngi, la ong ka seng.
