Da ka jingthmu ban nohsynñiang ha ka imlang sahlang khamtam ban ïarap ïa u duk u suk, sa shisien pat, ka Jaiñtia Hills Development Society (JHDS) ha ryngkat ka jingkyrshan ka KHUBLEI Germany kila aiti sa kawei ka ïing ba lah dep shna sha kawei ka longïing baduk kaba don ha ka Shnong Iangkar Nongjngi, West Jaiñtia Hills District.
Ïa kane ka ïing la ïarap bei tyngka da ka kong Petra Mayer kaba na ka Ri Germany bad la pynshna bad pynbit pynbiang da ka Jaiñtia Hills Development Society (JHDS) kawei na ki Seng Treimon Sngewbha ha Ri-Lum Jaiñtia.
Ïa kane ka ïing ba thymmai ha ryngkat bad katto katne ki tiar ba donkam kiba kynthup ïa ki Shuki Sofa, 2 tylli ki palong, 10 kylli ki stole, ka duli ka miej, ka Paiñkhana, la aiti noh sha ka ïing ka sem jong ka kong Maria Sumer ryngkat kiba haïing ha ka 09-11-2024.
Hashwa ban aiti ïa kane ka ïing, la don ka prokram ba lyngkot ba la pynïaid da ka kong Auxilia Dora Niang, Accountant ka JHDS ha ka jingïadonlang ka Meat Sumer, Rangbah Shnong, u Bah Denis Kurkalang, Coordinator ka JHDS ryngkat bad katto katne ki dkhot jong ka Dorbar Shnong Iangkar.
La ïoh ruh ban ot ïa u ribbon bad ka jingduwai kyrkhu kyrdoh da u Fr. Manbha Pakem, u Director ka JHDS, ryngkat ka jingsynran lang u Head Cathechist ka Mynsngat Parish, u ma Hamkom Pale.
Ha kaba kut ka prokram, ka kong Maria Sumer kala ai khublei ïa ki nongïarap, kyrpang eh ïa ka JHDS kiba la shim ïa kane ka sienjam ban pynïoh ïa ki kane ka ïing ba paka namar baroh shikatta ki la shu shong ha ka ïing ba la jot bha.
