[Thrang ban pynioh umbam ha man la kawei pa kawei ka thliew ïing ha nongbah Jowai]
U ma Wailadmiki Shylla u kyrtong ka National Peoples’ Party (NPP) na ka 2 Jowai Constituency mynta ka sngi nyngkong ha ka jingïalap Election jong u ha Ladthalaboh, Jowai ula pynsngew ïa ki project thymmai jong u kiba un sa pyntrei na ka bynta ka sor Jowai ha kine ki san snem ban wan.
Na ka liang u ma Wailad ula pynsngew kaba nyngkong u buh ïa ka thong ban wanrah sa kawei ka project sam umbam hapoh ka Jowai, da ka jingthmu ban pynioh umbam dih (water tap) kaba pahuh sha baroh ki thliew ïing hapoh ka nongbah Jowai, nalor kane kaba la don lypa.
Kumjuh u ma Wailad ula pynpaw ba dang donkam sa kawei ka Govt. College hapoh Jowai, namar kumba long mynta dang don tang kawei ka College sorkar hapoh ka nongbah Jowai. Haba ki jaka pule kila dap kala buh jingeh ïa ki kmie ki kpa ban phah skul ïa ki khun ki kti jong ki shabar na ka sor Jowai.
Ula pynsngew ba u don ka thong ban pynkiew kyrdan ïa ka Ialong Civil District Hospital sha ka State Hospital kumba long lem ha nongbah Shillong bad Tura ha kaba ki paidbah nongpang kim donkam shuh ban leit phah sumar shabar ka District ne ki jaka sumar jong ki riew shimet.
U don ka thong ban pynkiew ïa ka kam ïalehkai Sports hapoh ka District da kaba pynmiat pynbah ïa ka madan Kiang Nangbah naduh ki jaka mareh Track, ki Light ban pynthaba ha ka por mynmiet, ki Gallery ban shong peit kai bad kiwei de.
Kum u nongmihkhmat un dang ïaibteng ban pynlong ïa ki prokram ai jinghikai na ka bynta ki khun samla ba kin tip kumno ban ïeng hala ki jong ki kjat da kaba kim donkam ban ap ïa ka kam sorkar hapeng jong kane ka juk kyrduh kam bad kumjuh ïa ki Tuition ai jinghikai ïa ki samla pule ki ban ïakhun ïa ka Matric ha kane ka san snem ban wan.
Ula pynsngew shibun ki kam jingïarap na ka bynta ka shnong Ladthalaboh ha kaba na ka liang jong u, ula dep ai jingïarap lyngba ki skim bapher bapher khamtam ha ka por jong ka khlam Covid-19, da kaba pynïoh ruh ia ka Ambulance bad ka jingpynshna ïa Indoor Hall jong ka shnong.
Ula kyntu ïa ki paidbah nongshong shnong ka Ladthalaboh ba kin ai biang ka jingkyrshan ba pura ïa u ha kane ka kynti ban pynjop don burom ïa u, da kaba ong ba ki dang don shibun ki kam kiba u dei ban pyndep ïa ki kam pynroi hapoh jong kane ka shnong. Ha kane ka sngi la wan ban synran lang ïa u ma Wailadmiki Shylla bad ban ai jingkren da u ma Sniawbhalang Dhar kyrtong na ka 1-Nartiang, ka kong Phidalia Toi nalor ki MDC bad kiwei de. La sakhi ruh da ki hajar ngut ki paidbah nongkyrshan kiba wan sha kane ka jingïalang.
