Mynta ka sngi u Chief Minister ka jylla u Conrad K Sangma ryngkat bad u Chief Whip ka sorkar u Marcus N. Marak, u Chairman ka Meghalaya Transport Corporation ba dei u MLA ka Rongjeng u Jim Sangma lem bad kiwei de ki riewpawkhmat jong ka thaiñ kila sakhi lang ia ka jinglehburom ia ka sngi iap ba 150 snem jong u Pa Togan Nengminja Sangma uwei na ki nongialeh laitluid jong ka jaid bynriew Garo.
Ia kane ka jingrakhe leh burom la pynlong ha shnong Chisobibra hajan ka nongbah Williamnagar.
Haba kren ha kane ka jingialang u Conrad Sangma ula pynpaw ka jingsngewnguh kaba khraw ia une u nongialeh laidluid jong ka jait bynriew Garo na ka kti jong ki nongwei. Ula ong ruh ba ka long ka kamram jong uwei pa kawei na ki nongshong shnong ka Jylla ba kin iai kynmaw ia ki nongialeh laidluid jong ka bad ruh ban pynsaphriang ia kane ka khubor sha ki pateng ki ban sa wan.
Ula ong ruh ba ka long kaba donkam ban pynlong ia ka jingiapyni markylliang ia ki riti ki dustur jong ki nongshong shnong ka jylla khnang ba kiba dangkhie dangsan kin ioh ban tip shaphang ki riewshlur jong ka jylla.
Mynta ka sngi la pyllait paidbah ia ka Postage Stamp ha ka dur jong u Pa Togan Nengminja Sangma ban sahkynmaw da u Chief Minister ryngkat bad ki riew pawkhmat kiba iadon bynta lang ha kane ka jingialang.
U Chief Minister ula pyntip ruh ba ka sorkar kala don ka jingthmu ban pynbha shuh shuh ia ka Pa Togan Nengminja Sangma Memorial Park kaba don ha Chisobibra. Ula pyntip ba na ka liang jong u un ai T.50 lak tyngka kum ka jingsdang ia ka jingpyntrei.
Na ka liang jong u CM ula buh ruh ia u mawnongrim ban shna ia ka jingkieng nalor jong ka wah Rongon, kaba don ha u surok Rongbing boldak shaduh Chekwebibra. Ia kane ka jingkieng yn shna ha ka jinglut kaba T.7.81 klur tyngka.
La buh mawnongrim ruh na ka bynta ka jingpynbha ia ki surok pohshnong jong ka nongbah Williamnagar. U la pyntip ba ka jingpyntrei ia kine ki surok kan kot shaduh T.27 klur tyngka.
“Kane ka sorkar kaba buh ia ka thong ban wanrah shibun ki kam pynroi hapoh East Garo Hills bad ruh khamtam ia ka nongbah Williamnagar” ula ong shuh shuh.
