Mynta ka sngi ka HYC Padu Unit ka la ioh ban kner jingiarap sha ki longiing ba duk hapoh ka shnong Padu da ki jaiñ blanket, ha ka jingdon lang u Doctor ba peit iaka ka Padu State Dispensary kum u kongsan bad u President ka HYC War Jaintia Circle ha ryngkat bad u Secretary shnong ka Padu bah.
Ha ka jingkren u Dr. Arvin Khonglah u dap da ka jingsngewnguh shibun eh ba ka seng HYC Padu Unit ka la lah ban phai khmat lem da ka ba iarap ia u kup shiliang sem shiliang hapoh ka shnong ka thaw.
Ha kajuh kapor u kyntu ia ka seng ba kan nang trei shitom nangne shakhmat ha ki kam babha katba don ei ka buit ka bor na ka bynta ka jingbit jingbiang ka shnong ka thaw.
U secretary Shnong ka Padu bah Stelin Mukhim ula pynpaw ka jingkmen ba ka HYC Padu Unit ka don ka thong ban iarap lem ia kiba duk hapoh ka shnong, ha kajuh ka por ula ai ia ki jingsneng jingkhraw kum ki samla dei ban iai minot ban trei shitom ban dup lah ban kyntiew ia ka imlang sahlang.
Na ka liang u President HYC War Jaintia Circle samla Yoodahunki Shylla haba ai jingkren ula kyntu ia ki nongshong shnong ba ngi dei ban long ki briew kiba don ka jingiatylli ha ki shnong ki thaw khnang ba yn lah ban kyntiew ia kiei kiei ha baroh ki liang
Ha kajuh ka por ula kyntu ia ki para samla ka thaiñ ha kane ka juk kyrduh kam duh jam ba kim dei ban lehraiñ ban trei ia kano kano ka kam, dei ban mihshakhmat ban ieng ha la ki jong ki kjat khnang ba ka thain jong kan dup kiew irat.
U la ong ruh ba ha kine ki sngi la sdang don ki riew shim kabu kiba mut ban ialam bkla ia u paidbah ka thain, u kyntu iaki paidbah ba kim dei ban ailad ia ki riewshim kabu kiban ialam bkla ia ka thain War Jaintia.
Na ka liang jong u Samla Dikermi Mukhim President ka HYC Padu Unit u ba la ai khublei ia baroh kiba lah ia don ryngkat bad snohkti lang bad ka seng kat haduh ba la lah ban pynurlong ia ki jingthmu jong ka seng.
