Ka Khasi Student Union (KSU) Jowai Unit, mynta ka sngi 30.10.2021, kum ka dak ka jinglehkmen ia ka jingdap shi snem pura jong ka jingkri jong ka hapoh ka nongbah Jowai, kala pynlong da ka jingpynkup burom ia ki samla pule kaba la tip kum ka Maitshaphrang Academy Award.
Ha kane ka sngi ka Seng kala ioh ban pynkup burom haduh 52 ngut samla ka nongbah Jowai kiba pass bha ha ki eksam jong ka HSSLC bad SSLC jong une u snem 2021.
Mynta ka sngi ha kane ka jingpynkup burom la pyniaid ia ka jingialang da u samla Leonard Dhar, ha kaba u Deputy Commissioner ka West Jaintia Hills District u bah Garod LSN Dykes u long u kongsan bad u MDC ka Jowai Central u ma Andrew A Shullai u la long kum u symbud kongsan, haka jingiadon lang ka Principal jong ka Kiang Nangbah Government College Jowai Dr. Easter M Blah, General Secretary Synjuk ki Waheh Shnong Jowai ma Riquima Laloo, ki nongialam ka KSU CEC bah Ostarnic Marbaniang Organising Secretay, bah Daniel Khyriem Ex-President KSU CEC, ki Waheh Shnong, bad kiwei de kiba shah khot sngewbha sha kane ka jingrakhe dap shi snem bad pynkup burom ia ki samla pule ba pass bha.
La pynphuh pynphieng shuh shuh ia kane ka sngi da ki jingshad tynrai bad jingrwai ieit ri da ki dkhot ka KSU Jowai Unit kaba la shim bynta da ki samla kynthei bad shynrang.
