Ka Sohkha Mission Village Durbar ka la pynlong ïa ka jingai khusnam ïa ki samla pule ka shnong kiba la jop bad wan shakhmat ha ki exam bapher bapher ha ka jingïalang bala pynlong ha ka 28 tarik u Nohprah 2023.
Ha kane ka sngi na ka liang u ma Holando Lamin MDC ka thaiñ u la long kum u kongsan, uba la air uh ka jingïaroh ïa ka shnong Sohkha Mission kaba la ïohi jngai ban pynshlur ïa ki khynnah pule ban trei minot ban poi shakhmat ha ki exam bapher bapher.
Ula kyntu ruh ïa ki khynnah pule ban trei shitom ban wanrah nam ïa ka ïing ka sem, ka shnong bad ka thaiñ hi baroh kawei. Ula ong ruh ba nym ai lad ïa ka jingduk ban khanglad ïaki ban poi shakhmat ha ki jingpule bad ba kin long kiba jan sha U Blei ban lait na ki jingsniew.
Ka kong Dolly Khonglah Secretary Meghalaya International Chambers of Commerce, kala ai jingïaroh ïa ka shnong ïa ka jingpynshlur ïa ki samla pule da kaba ai kum kine ki khusnam sha ki samla pule ka shnong kiba la wan shakhmat ha ki exam bapher bapher ba ki lah ïaleh.
Kala ban ruh ïa ki samla ban ïaleh ban kiew shakhmat kumba long kiwei kiwei ki jaitbynriew ha ka ri, shuh shuh ka ong ba lada kiwei ki lah, balei ba ki samla jong ngi kin ym lah?.
U ma Monjurlang Pohlong Sub-Inspector Statistic Wapung C&RD Block, ula kyntu jur ïa ki samla pule ban long kiba don ka discipline haka jingim jong ki bad ban nang ban bate ïa ka por khnang ba kin ïoh ïa ka jingjop ha ka jingim.
U ma Precious Stone Suchenuba long u Waheh Shnong jong ka Sohkha Mission ula ai ka jingkren bad pynshlur ïa ki Samla pule jong ka Shnong ba kin long kiba minot bad ban ïaleh katba lah ban poi shakhmat haka jingpule khamtam ha kane ka juk Competition kaba mynta.
La pynïaid ïa kane ka prokram da ma Handleson Lamin Gadew bad la pynshongshit ïa kane ka jingïalang da ki jingrwai na ki samla ka shnong, kiba kynthup ïa u Sardis Dkhar bad ka samla Barikynti Khonglah. Katba ïa ki kyntien ai khublei la ïoh na u Marshall Manner, General Secretary jong ka shnong.
