Ka Jaintia Hills Development Society (JHDS) ha ryngkat ka jingiatreilang bad ka National Bank for Agriculture and Rural Development (NABARD) ka la pynlong ia ka jingai jinghikai halor ka kam Shna light (House Wiring) ia ki 31 ngut ki Samla Shynrang kaba la sdang naduh ka 6 tarik haduh ka 30 tarik u December 2021.
Katba ka jingsam ei ia ki tiar pyndonkam (free tools Boxes) la sam mynta ka sngi kata 14 tarik u February 2022 da u President ka KHUBLEI Germany, u Sir Garhard Albert. Kum ban shu kdew hangne, ka KHUBLEI Germany ka dei ka Seng trei mon sngewbha bad kumjuh ruh ka long ka shnat treikam jong ka JHDS kaba don ia ka ophis treikam hapoh ka Ri Germany. Ia kane ka Seng la sdang ha u Snem 2019 bad haduh mynta ka la lah ban kner ia ki jingiarap haduh 52 ngut ki khynnah skul kiba duk da kaba iarap baiskul/baikot (Educational Sponsorship) naduh class I haduh Class XII. Ym tang katta kane ka seng ka la iarap ruh ha ka ban ai free tuition class ia ki khynnah skul ba duk kiba shong class IX bad X ia kaba la sdang ha ka Shnong Mihmyntdu ha ryngkat ka jingkyrshanlang ka JHDS. Nalor kine ki kam kane ka seng ka la iarap ruh ban kyntiew ia ka ioh ka kot ki nongrep kane ka thaiñ da kaba ai shibun ki training prokram bad ki lad jingiarap ha ka ban sdang ia ki Micro Enterprise Unit ha ki 5 tylli ki shnong kiba hap ha Laskein bad Thadlaskein Block.
Ia kine ki tiar (free tools boxes) la sam da u President ka KHUBLEI Germany ha ryngkat ka jingiadonlang u Asst. General Manager ka NABARD u Sir. Grevile Kharlukhi ryngkat bad u Director ka JHD u Rev. Fr. Manbha Pakem. Haba ai jingkren, baroh lai ngut kine ki Sahep kila kyntu bad pynshlur ia kitei ki samla ba kin pyndonkam hok ia ki jingtip bad ki tiar kiba kila ioh khnang ba kin lah ban ieng hala ki jong ki kjat. Ia ka prokram la pyniaid da u Coordinator ka JHDS u Bah Denis Kurkalang ryngkat bad katto katne ki nongtrei ka JHDS.
