U myntri ka tnad ka koit ka khiah, Sport and Youth Affairs bad ka Home (Passport) u ma Wailadmiki Shylla uba dei ruh u MLA ka 2-Jowai Constituency ha kane ka 25 tarik ula sam ïa ki Work Order kaba la kynjoh sha ka 1 klur tam sha ki shnong kiba hap hapoh ka Constituency, haka jingïalang kaba la long ha Highwinds hajan ka pung Thadlaskeiñ, West Jaiñtia Hills District.
Na ka liang u Myntri ula ong ha ki por mynshwa u juh leit sam da lade ïa kane ka skim sa ki shnong hapoh ka Constituency, hynrei naduh kane ka kynti hadien ka jingshah jied kum u Myntri sorkar ula hap ban pynlong ha kawei ka jaka naka bynta ban sam ïa kane ka skim namar ka jingdawa jong ka kam kum u myntri.
Shuh shuh ula ong kane ka dei ka MLA Skim jong u snem 2024-2025 bad kine ki work order ki kynthup na ka bynta ki shnong, ki kur, ki sein raij, ki skul bad kiwei de kiba kynjoh sha ki 30 tylli kaba kot 1 klur tam na ka Special Rural Works Programme (SRWP). U la pyntip shen ha kine ki sngi ban wan un sam sa ïa ki tin sop ïing sha ki shnong ki thaw hapoh ka Constituency.
