U MLA ka 2-Jowai Constituency ma Wailadmiki Shylla mynta ka sngi ula sam ïa ka skim Special Rural Works Programme (SRWP) sha ki 406 ngut ki nongïoh myntoi hapot katei ka Constituency khamtam kiba dei hapoh ka sor Jowai ïa kaba la pynlong ha Ladthalaboh Indoor Hall, Jowai.
Ïa kane ka skim la sam sha kitei ki 406 ngut lyngba ka Cheque kaba long 10,000 hajar tyngka marwei.
Hashwa kane la don ka jingïalang ba lyngkot ba la pynïaid da u ma O. Lamin, Nominated MDC, ha ryngkat ka jingdonlang u ma Brightstar Chyrmang MDC uba la kren ai khublei, ma Ailad Bhoi MDC, ma Lakhon Dkhar MDC, ma Ebormi Lyngdoh District President, ma Lasoo ki Lakiang Waheh Shnong Ladthalaboh, ma Abul Phawa Waheh Shnong Mihmyntdu, Secretary District ma Donbok Jana nalor kiwei de.
U ma Wailadmiki haba ai jingkren ula pynsngew kat ka bor ula pyrshang ban pynïoh salonsar sha baroh ki nongïoh myntoi hapoh ka Constituency. Ula ong wat ha kine ki ar snem kiba la leit naka daw jong ka khlam Covid-19 kaba la wanrah ka jingeh kaba khraw ban sam ïa ki skim paidbah, hynrei dei hadien jong ka khlam la lah ban sdang noh ïa kane ka jingsam ïa ka skim MLA.
Shuh shuh ula pyntip ba na ka skim jong u kaba i dang don sa lai snem mynta un sa lah ban sam pyndep noh ïa ka ha kine ki sngi ban wan.
“Wat lada ym pat lah ban sam lut ïa ka skim sha ki nongïoh myntoi hapoh ka Constituency hynrei un pyrshang katba lah ban pynïoh lang ïa baroh kiba dei hok ban ïoh” la ong u MLA.
