U Myntri Rangbahduh ka ri, u Narendra Modi mynta ka sngi u la sam kumba palat 51,000 tylli ki shithi rung kam sha ki briew kiba dang pynrung thymmai lyngba ka video conferencing. La pynlong ia ka Rozgar Mela ha ki 45 tylli ki jaka kylleng ka ri.
Lyngba kane ka Rozgar Mela, ka tnad treikam kaba peit ia ki kam pohiing ka sorkar pdeng ka Ministry of Home Affairs ka la pynlong ia ka jingpynrung kam ha ki tnad bapher bapher ka Central Armed Police Forces (CAPFs) kum ha Central Reserve Police Force (CRPF), Border Security Force (BSF), Sahashtra Seema Bal (SSB), Assam Rifles, Central Industrial Security Force (CISF), Indo Tibetan Border Police (ITBP) bad ka Narcotics Control Bureau (NCB) kum juh ruh bad ha ka tnad Delhi Police. Kine kiba dang rung thymmai ha ka kam kiba la jied na kylleng ka ri, kin sa trei ha ki kyrdan bapher bapher kum ki langrut (constable) (General Duty), ki Sub-Inspector (General Duty) bad ki Non-General Cadre Posts ha ki tnad bapher bapher kiba hap hapoh ka jing peit ka Ministry of Home Affairs.Haba kren ha kane ka jingialang, u Myntri Rangbahduh u la ai ka jingiaroh ia kine kiba la shah jied thymmai ban rung kam kum ki “Amrit Rakshak” ha ka por ka Amrit Kaal. U la jer kyrteng ia ki kum ki “Amrit Rakshak” namar kine kiba dang shu ioh ban rung kam kin trei ym tang ban shakri ia ka ri hynrei ban iada ruh ia baroh ki para ri.Phi dei ki “Amrit Rakshak” jong kane ka “Amrit Kaal”, la ong u Myntri Rangbahduh ka ri. U Myntri Rangbahduh ula pruid lain ba ka jingpynmih ia ka Rozgar Mela ka la long ha ka por ba ka ri hi baroh kawei ka dap da ka jing sngewsarong bad ka jing sngewskhem. U la ong ba ka Chandrayaan 3 bad ka Pragyan Rover (ki lieng kiba la phah sha haw haw ban shon dur) ki iai phah ia ki dur ba dang shibit jong u bnai. Ha kane ka por ka jingsngew sarong, u Myntri Rangbahduh u ong ba kine kiba la pynrung kam thymmai kin sdang ban iaid ia ka lynti badonkam eh baroh shilynter ka jingim jong ki bad u la phah ia ka jingkit bok kit rwiang sha baroh kito kiba la shah jied thymmai bad sha ki bahaiing hasem jong ki ruh. U Myntri Rangbahduh ula kren ban halor ka jingkit khlieh kaba mih ha kaba jied ia ki kano kano ka kam ha ki tnad iada ri bad tnad pulit bad u la iathuh ruh ba ka sorkar pdeng ka la shim khia bha halor ka jingdonkam ban jied ia ki nongiada ri. U la iathuh ruh ba ka la don ka jingkylla ha ka rukom ban jied ia ki nongiada ri. Ka rukom jied ban pynrung kam thymmai ka la nang iaid stet bha naduh ka por ba pdiang ia ki kot apply kam haduh ka kynti ban jied, ha kaba la pynlong ban thoh ha ki examin da ka ktien tynrai. U la batai ruh ia ka bhah ba la mang kyrpang na ka bynta ki samla kiba shong sha ki khappud bad kito kiba sah ha ki jaka kiba ju shah pyndik ha ki seng lehnoh. U myntri ka sorkar pdeng uba peit ia ka tnad Micro Small and Medium Enterprises (MSME) u Bhanu Pratap Singh Verma u la snohkti lang ha kane ka Rozgar Mela ha ka jaka ba shong u Ophisar Rangbah ka tnad Assam Rifles, Laitkor, Shillong, ha kaba u la sam ia ki shithi rung kam sha kito kiba ba la shah jied thymmai da kaba pynbud ia ka jingkren u Myntri Rangbahduh ka ri. Kumba 218 ngut kiba la ioh ia ki shithi rung kam jong ki ha ka sien kaba phra jong ka jingpynmih ia ka Rozgar Mela kaba la long ha Shillong mynta ka sngi.U myntri ka sorkar pdeng u Bhanu Pratap Singh Verma haba pynpaw ia ka jingsngewkmen ka jong u ia ka jingpynlong ia ka Rozgar Mela kaba jop, u ong ba la pynkhreh ban iaid shakhmat na ka bynta ban pyllait kumba shiphew lak tylli ki kam sha ki khun samla ka ri ha ki tnad treikam bapher bapher ka sorkar pdeng. Kane ka dei ka sienjam kaba kongsang ban pyndep ia ka jingiai pyrshang u Myntri Rangbahduh u Narendra Modi ban pyntikna ha ka jingioh kam ioh jam ki khun samla khlem da don kano kano ka jingleh shiliang ne ka jingbam sap. U la iaroh ia ka jingpyrshang ka sorkar pdeng ban pyniaid shaphrang da kaba ai lad ia ki samla ban mih shakhmat ban ialeh ia ki examin jong ki ha ka ktien tynrai. U la pynpaw ruh ba kane ka jingialeh kan pynlah ia ki samla na ki bynta bapher bapher ka ri ban mih sha khmat ban ia ia khun ia kine ki examin ym ha ka ktien nongwei(English) hynrei ha ki 13 tylli ki jait ktien tynrai ne ha ka ktien hindi kumba la ju leh. Ula batai bniah ba ka Rozgar Mela ka dei ka jingpynsdang ba don jingmut jong ka sorkar pdeng, U Singh u la ong ba da ka jingpynmang sa kumba 51,000 tylli ki lad thungkam thungjam, mynta haduh kumba 5 lak ngut ki samla ki la ioh ia la ki shithi rung kam tang hapdeng 8 tylli ki Rozgar Mela kiba la long. U myntri ka sorkar pdeng ula kyrpad ia kine kiba la ioh rung kam thymmai ba kin trei barabor na ka bynta ka bha ka miat bad jong baroh ki para ri. Da kaba pynpaw ia ka jingkmen ka jong u sha baroh kiba la shah jied ban rung kam thymmai, u myntri u la ong “ Ha u snem 2047 haba ka ri India kan lehkmen ia ka jingdap 100 snem ka jingioh jinglaitluid, kine samla kiba la ioh rung ha ki kam iada ri ha kata ka por kin sa dang kiew kha ka kyrdan ka kam ka jong ki, namar kata, u Myntri Rangbahduh u la pynpaw ia ka jingkyrmen ba kine kiba dang shu rung kam thymmai kin trei da ka mynsiem aiti lut ialade ban shakri ia ka ri bad ia ki para ri bad ha kawei ka por kin sa long ki nongshong shnong kiba kordor ka ri. Ka kong Baiahunlang Syngkli, kaba long kawei napdeng kiba la shah jied ban rung kam thymmai ha ka tnad BSF, haba ka pynpaw ia ka jingsngewkmen ka la ong “Nga la sngewkmen shikatdei eh, bad ka burom baroh ka leit sha u Blei. Nga la kmen ba nga la ioh ia kane ka kam namar ba nga la trei shitom bha naduh kaba sdang”. Ka la kyntu bad pynshlur ia baroh ki samla ban long kiba trei shitom bad ban trei na ka bynta ka ri bad ka jaitbynriew hi baroh kawei.Sa kawei pat ka samla kaba la ioh ban rung kam kaba na ka jylla Meghalaya, ka Parbati Hajong ka la pynpaw ka jingsngewnguh ia u Myntri Rangbahduh na ka bynta kane ka kabu ba ka la ioh ban rung kam ha ka tnad CAPF, ha kaba ia ka ka la ioh ruh hangto hangto ia ka shithi rung kam ka jong ka. Ka ong “Nga sngewkmen shibun ban don lang hangne ha kane ka sngi ha kaba ngi la ioh pdiang ha la ki kti ia ki shithi rung kam. Ka kmie jong nga ruh kan jin da la kmen shibun ban sakhi lang ia kane. Ngan pyndep ia la ka kamram da ka mynsiem aiti lut lade. Nga kwah ban pynpaw ia ka jingsngewnguh jong nga sha u Myntri Rangbahduh ka ri. La plie ia ngi ia ka lad ban rung kam ha ki kam shipai bad ki kam iada ri. Ym don shuh kaba kham pynkmen ban ia kane mynta.
Da kaba pynkhlain ia ki CAPFs kum juh ruh ia ki Pulit ka Delhi kan iarap ia ki shipai bad ki pulit ha ki kam kiba bun bynta kum ha kaba iarap ban peit ia ka jingsuk jingshngiañ hapoh ka ri ne jylla, ban ialeh pyrshah ia ki kam shyrkhei, ban ialeh pyrshah ia ki seng lehnoh ban ialeh pyrshah ia kino kino ki seng ne kynhun kiba pyrshah sorkar bad ban iada ia ki jaka khappud ka ri. Ka Rozgar Mela ka dei ka sien jam ban pyndep ia ki jingkular ba ha khliehduh u Myntri Rangbahduh ka ri ban pynioh kam ioh jam ia ki pateng kiban sa wan. La khmih lynti ba ka Rozgar Mela kan long kum kata ka lad ban iarap pynioh kam ia ki pateng ki ban dang wan bad ban ai lad bad pynkham bor ia ki samla ban pynpaw ia ka jingsan bad jingroi ha ka ri. Kine nong shah jied thymmai ha kine ki kam ki ioh ruh ia ka lad ban shah hikai ia lade lyngba ka Karmayogi Prarambh, kaba dei ka jingpule online kaba lah ban shem ha iGOT Karmayogi portal, ha kaba lah ban shem kumba palat 673 tylli ki jinghikai bad jingpule ba la pynwan dur bha ia kaba lah ban shem ha “anywhere any device” da kaba pyndonkam ia ka internet.