Hynne ka sngi ka 16 Nohprah 2024, ka Meghalaya SSA School Association (MSSASA) ka la pynlong ia ka jingialang ha madan student, bad kawei na ki mat ba ki nonghikai SSA ki la shim rai ka long ban sangeh noh ia ka jingiakhih hynrei ha kajuh ka por kin buddien ban pynurlong ia ki mat jingdawa lyngba ka jingiakren bad ka sorkar Jylla.
Haba kren sha ki lad pathai khubor, u Bah Aristotle Rymbai President ka MSSASA, u la ong ba ha ka jingialang la mynjur ban pynsangeh noh ia ka rai ban iakhih, kumba la shim ha ka 2 Tarik Risaw 2024 bad ban buddien bad iathir ban pynurlong ia ki mat jingdawa lyngba ka jingiakren.
Shuh shuh u la ong, ha kaba iadei bad ki nonghikai kiba dei ban leh ne pyndep ia ka Meghalaya Teacher Eligibility Test (MTET), ka Sorkar ka dei ban shimkhia ia baroh ki nonghikai SSA ki ba pyniasoh sha ka kam ha lane shwa ka 1 Naitung 2020.
U la kdew hangne ba ka 1 Tarik Naitung 2020 ka dei ka Tarik ba ka tnad pule puthi ka la pynmih ia ka notification halor ka jingdonkam ki nonghikai ban pass ia ka MTET exam.
Nalor kane ki nonghikai SSA ki la shim rai ruh ban ai jingmut sha ka sorkar ban thung noh da ka Empower Committee kiba kynthup ia ki ophisar na ka tnad pule puthi ka sorkar Jylla, ka tnad law, ka tnad personal, ka tnad Finance, ka tnad Planing bad na ka association khnang ban ioh ban iakren halor ki kam kiba dang sahteng kiba iadei bad ki nonghikai SSA.
