Ka Party Congress kaba dei ka party kaba la rim bad kaba la synshar bun snem ha ka Jylla Meghalaya mynta ka kynti ka la sdang ban khie im sa shisien na ka jingbteng jong ki Nongialam bad ki MLA barim ban wanphai sha ka Party kaba ki la sdang ia ka jingiaid lynti ha ka Jylli jong ka Sain Hima.
Kane ka sngi kan long ruh ka sngi ka ban nang ai mynsiem shuh shuh ia ka Party hadien ba ka la khyllem noh ha kine ki khyndiat bnai na ka jingphet seng jong katto katne ki MLA bad ki Nongialam sha kiwei pat ki party.
Ha kane ka sngi, ka Party ka la pdiang sngewbha sa shisien sha la ïing ia u John Leslee K. Sangma u MLA barim na South Tura uba dei ruh u MLA barim na kane hi ka Party, kata tang hadien shibnai pura (19.10.2025) ba wanphai u Zenith Sangma uba dei u para trai jong u Mukul Sangma sha kane ka party.
Ha kane ka sngi pdiang burom, la don ryngkat da u Khlieh jong ka Party u Bah Vincent Pala, ka Deborah C. Marak Working President MPCC bad kiwei kiwei ki nongkitkam ka Party.
Na ka jingiohi ia ka jingtreikam jong ka Sorkar Jylla bad ka Sorkar pdeng, u Leslee u la kynthoh ba ka Sorkar kaba synshar mynta kim lah ban treikam bha khamtam ban kyntiew ia ka iohkam iohjam ia ki samla bad ia ka lawei jong ki. U Sangma u la pynksan ba tang ka Congress kaba lah ban iada ia ka hok jong ki paidbah bad ban pynioh pat ia ka jingduh noh ia ka roi ka par.
