U Assistant Commissioner ka West Jaiñtia Hills District u bah W. K. Kharbuli, MCS mynta ka sngi Balang ula plie ïa ka ïew pyni nam ïaki mar rep kaba la tip kum ka “35th District Level Industrial Exhibition” kaba ar sngi lynter ïa kaba la pynlong ha phyllaw jong ka ophis u General Manager, District Commerce & Industries Centre, Mihmyntdu, Jowai.
Ïa kane ka ïew la pynlong da ka ophis jong u General Manager, District Commerce & Industries Centre, Jowai ka ban kut lashai ka sngi 8 tarik u Rymphang, ha kaba la don haduh 30 tylli ki stall kiba la wan ban die ïa ki mar ki mata jong ki.
U bah W.K Kharbuli haba ai jingkren u ai ka jingïaroh ïa ka ophis DCIC kaba la lah ban pynlong ïa kum kane ka ïew pyni nam kaba long ruh shi bynta ban pynpaw pyrthei ïa ki sap ki phong jong ki nongrep naduh ki nongsuh nongthaiñ thri, ki nongsuh jaiñ, ki nongthaw khiew bad kiwei de ki kynhun kiba seng ïa ki kharkhana rit ban pynmih ïa ki mar jong ki napoh ka District.
Ha ka juh ka por ula ai mynsiem ïa baroh ki nongiashim bynta kiba la wan sha kane ka ïew pyni nam, kaba long ruh kum shibynta ban ai mynsiem shuh shuh ïa ki ban seng ïa ki kam la jong khnang ba kin lah ban pyndap ïa ka jingdonkam jong ki ha ki sngi ban wan bad ban kyntiew ïa ka ïoh ka kot.
Na ka liang u General Manager DCIC bah B. Warjri haka jingkren pdiang sngewbha ula batai khyndiat shaphang ka jingpynlong ïa kum kane ka ïew pyni nam kaba long ka lad jingïarap ïa ki trai jylla kiba seng ïa ki kam la jong bad haka juh ka por ki lah ruh ban pynpaw pyrthei ïala ki mar rep jong ki.
