Ka Dorbar Mang Tyngka jong ka Khasi Hills District Council (KHADC) ka la sdang hynne ka sngi ka 26 tarik Lber 2025 ha kaba la ioh ruh ban jied ia u Deputy Chairman ka Council.
Hadien ka jinglah jong ka Voice of the people’s party (VPP) ban khur jingjop haduh 17 tylli ki konstitwensi ha kane ka samoi, la ïalam ruh ia ka council da ka VPP ha kaba u Bah Shemborlang Rynjah u la long kum u CEM ba thymmai bad Bah Strong Pillar Kharjana kum u Chairman. Ha kane ka sngi kaba sdang jong ka Dorbar, la ioh ban pynbna ruh ia u Bah Kynjohlang Rangtong kum u Deputy Chairman ba thymmai hadien ba la jop suk ia kane ka shuki ba khlem don ba ïakhun pyrshah.
Ha kane ka samoi treikam, u Bah Titos Chyne uba long u Nongïalam liang pyrshah ryngkat 10 ngut ki dkhot (Kynthup na ka UDP) u la ai Khublei ia u Bah Kynjohlang uba ioh ia ka kabu ban shim ia kane ka bynta.
Hadien ba la dep ban pule ia ki mat bad ki jingbuh thong jong kane kynhun ba ïalam ia ka Dorbar, na ka liang u Bah Titos u la pynpaw ia ka jingdiaw ba ka ïing Dorbar hapoh ka jingialam ka VPP ka klet ban kynmaw burom ia u Bah W.Mathiw Mawtkhap (MDC barim ka Sohra Constituency) uba la khlad dang shen bad kane ka dei ka sien ba nyngkong ha ka history jong ka District Council, ba khlem kynthup lang ia ka kyrteng jong ki MDC ba la khlad ha ka sngi ba sdang ka Dorbar, ong u Bah Titos. Ha kaba iadei bad kane ka mat, u Bah Titos u la ther ia ka VPP bad ong ba ka VPP ka klet lane khlem shim khia ban tynsat lang ia kane ka mat na ka jingbym pat tbit ban ïalam bad ba ka dei ka seng ba dang lung lane ka seng ka bym pat san pura bad kaba dang shu kha.
U Bah Titos u la ther ruh ia u Chairman ba naduh ba sdang kane ka samoi thymmai la pynkynriah noh ia ki Lad pathai khubor (Press) shajrong jong ka mala bad kane ka ktah ia ki nongkyrshan bad ki nongpeit kiba kwah ban iohi khambha bad kham shai ia ka jingpynlong Dorbar. Ha kaba iadei bad kane ka mat, u Chairman u la panmap bad kular ban pynbha na ka bynta ka jingiabit ia biang lang.
Ha kane ka sngi u Bah Seiborlang Warbah uba dei ruh u MDC ba khmih ia ka pla Tyngka jong ka council u la wanrah ia ka Mang Tyngka kaba kot 35,40,50,600/- ka ban treikam naduh 1 tarik Iaiong 2025 haduh 30 Jylliew 2025. U Bah Seiborlang u la iathuh ruh ba namar ba khim palat ka por, ia ka Mang Tyngka ba pura, kata na ka bynta u snem 2025-26 yn sa wanrah ha kawei pat ka Dorbar.
Ha kaba iadei bad ka jingkylli ba la wanrah da ka Kong Grace Mary Kharpuri kaba dei na ka bynta ka jingpynlong ia ka Monolith Festival kaba dei ruh ka tamasa ba shisien shi snem ba la pynlong da ka KHADC, u CEM u la ong ba ia kane ka mat ka komiti ka khlem pat rai ei ei bad yn sa bishar shwa na ka bynta ka jingbha.
