Ka Dorbar mang tyngka jong ka Jaiñtia Hills Autonomous District Council (JHADC) Jowai kaba la sdang mynta ka sngi 26 tarik u Lber 2022 kala long kaba ïaid beit ïaid ryntih, ïa ka Dorbar la pynïaid da u Chairman ka JHADC u Dr. Sankey Shangpung bad kane ka Dorbar kan bteng biang lashai ka sngi 27 tarik Lber 2025.
Ha kane ka dorbar na ka liang u Chairman ula ai lad ban buh jingkylli tang mar lai tylli na uwei u MDC, na ka liang u MDC ka Congress na ka 4-Amwi Khliehtyrshi ma Madonbai Rymbai uba la pan jingshai na ka Executive Committee haduh katno bnai ka tulop ba dang sah ki nongtrei ka Council; la jubab da u CEM ka dang sah sa hynriew (6) bnai, u pyntip ha kine ki bnai ban wan yn sa pyllait noh ïa ka tulop kaba dang sah baroh.
Ha kaba ïadei bad ka jingkylli kaba u ma Rymbai ula buh haduh katno tylli ki Beat Officers bala pynïaid da ka Executive Committee hapoh u pud u sam ka JHADC la jubab da u EM ma H. Nongtdu ki don 3 tylli bad ïa kine la aiti sha ki riew shimet ban pyntreikam.
U MDC ka Congress na 13-Saphai Sahsniang u Rikut Parein ula buh jingkylli katno tylli ki Land Holding Certificate & Patas kiba la dep issue hapoh ka Elaka Raliang naduh ka 1 tarik u April 2024 haduh 1 March, 2025; ki don 104 tylli ki (LHC) bad bad 35 ki Pattas ryngkat ka dor bala buh na ka Council la jubab u EM ma B. Iano. Namar ka jingslem palat ki nong apply LHC ban ïoh ïa kiLHC na ka Council ula kyntu jur ïa ka Council ba kan pynkloi noh ïa ka kam haba issue ïa ki LHC.
Ha kaba ïadei bad ka bhah pisa ba ka Council kala ïoh khadduh na ka sorkar jylla; u CEM ula jubab dei haka 24.01.2025. Katba na ka jingïoh lum khajna na ki ïew kiba dang hap hapoh ka jingpeit ka Council kiba don 16 tylli ka long T.26,49,411/- tyngka haduh ka 1 tarik u March 2025.
U MDC ka VPP na 17-Nangbah Mihmyntdu u Gresentus Susngi ula kylli haduh katno ka jingpyndonkam ïa u mawshun da baroh ki Cement Plant kiba hap hapoh ka Council naduh ka 1 tarik April 2023 haduh 31 March 2024; ka poi sha ka 1,11,36,276 metric ton bad ki karkhana kiba treikam pura mynta ki don 7 tylli, la jubab u CEM.
U MDC ka VPP na ka 2-War Central, u Jamshaphrang Pohtam ula buh jingkylli katno tylli ki ïew kiba peit da ka Council bad ki ïew shimet kiba don hapoh ka Amlarem Sub-Division , la jubab ki don mar kawei kata ka ïew Muktapur kaba ïoh lum T.60,000/- bad na ka ïew Dawki T.13750/- ha ka shisnem. Ha kaba ïadei bad ka ïew Jaraiñ kaba la shah khang ha ka 26 September 2023 ula kyntu ïa ka Council ban pynbeit kloi ïa kane ka kam khnang ban ïoh noh ïa ka ïew ha Jaraiñ.
Utei u MDC na ka War Jaiñtia ula kyntu ïa ka Council ba kan ithuh noh ïa kawei na ki shad lehniam ‘Rong Khli’ hapoh ka Nongtalang. Katba ka MDC jong ka VPP na 9-Mynsoo Nongjngi kong Laiawanlamjinghun Khyriam kala buh jingkylli ha kaba ïadei ba ki rukom apply ïa ki kot LHC.
Ha kane ka Dorbar la thung ruh ïa ki MDC ki ban shimti ïa ka kam Chairman bad Adviser kiba kynthup ïa u ma Moonlight Pariat kum u Chairman ka Planning Board, u ma Wailaddameshwa Siangshai kum u Honorary Forest Adviser, u ma Reformingson Lamare kum u Chairman Customary Law Committee, u ma Krison Langstang kum u Chairman Resources Mobilisation Committee, u ma Wormanship Shadap kum u Chairman Land Revenue and Land Reform bad u ma Mihnyngkong Sutnga kum u Chairman, Rules Advisory Committee. Haka juh ka por la pynkiew kyrdan ia ki ophisar jong ka Council. Kum ka dak ban kynmaw burom ïa ki ar ngut ki EX-MDC kila khlad noh kata u (L) Speinlang Rymbai bad u (L) Ngamthangkhupa Darnei ka Dorbar kala pynlong ruh ka jingsngap jar ba shipor bad pynpaw ka jingsngewlem sha kiba ha ïing ha sem jong ki.
