U Lat ka Jylla C.H. Vijayashankar hynne ka sngi ha ka jingsdang ia ka Dorbar Mang Tyngka u la ban bunsien ba ki dkhot ka Ïing Dorbar kin ialeh ban pynneh pynsah ia ki matti ki longshwa, ia ka kolshor bad ka jinglong tynrai ka jylla.
Ha shwa ban sdang ia ka jingkren, u Lat u la sdang da kaba kren ai Khublei da ka ktien Khasi bad Garo “Nga ai Khublei ia phi baroh”. Ryngkat ka jingdiaw u la panmap na ki dkhot jong ka ïing ba um da khlaiñ bad u hap ban wan Dorbar da ka wheel chair da kaba ong ruh ba kane kadei ka sien ba nyngkong ba um lah ban iaid hi bad ban pyndonkam da ka wheel chair.
Haba mait phang ia ka jingkren, u Lat u la ong ngin iai bteng ia ka jingiaid lynti da kaba buh thong ba ka Meghalaya kan kiew ha ka ioh ka kot, kata ban poi ia ka jingdon kaba haduh 10 billion US Dollar ha shwa u snem 2028.
“Ban ïatreilang na ka bynta ka lawei kaba bha ia ki nongshong Shnong jong ka Meghalaya, ia ngin ia tylli ban iabeh ia ka jingtyllun kaba la ñiah da ka jingiohi jngai na ka bynta ka jingdapbiang, ka jingkiew jong ka Jylla Meghalaya. Kane ka ïing (Dorbar) ka la don ia ki matti kiba khraw ban pynneh ia ka rukom im kaba paka. Nga kyrpad ia ki para Dkhot ba don burom ba kin iai rah bad iai im ia kane ka jinglong tynrai kaba dei ruh ka Nongrim ba baroh ki sngew sarong” ong u Lat.
“Ka Sorkar ka kut jingmut ban kyntiew ia ka Meghalaya ha baroh ki liang, kata ym tang ha kawei ka bynta, da kaba pynleit jingmut ruh ha ka jingriewspah ka kolshor jong ka jylla”.
U Lat u la iathuh ruh ba ka Sorkar ka la ïakhun tyngeh ha une u snem ba lah dep ban kyntiew ia ka Jylla ha kaba la wanrah ruh ha ka sien ba nyngkong ia ka jingtreikam lyngba ka ‘CM Connect’ bad ‘Hello Meghalaya’. U Lat u la pynshai ba ka jingpynithuh ia kine ki projek ba thymmai ka long ban kyntiew ia ka iohkam ioh jam, ia ka kolshor lane ka jinglong tynrai u Khasi bad kiwei kiwei.
Nalor kata u Lat u la iathuh ruh ba ka kam pynroi ka bun bha kynthup ka jingpynbha ia ki surok, ka bording, ki umbam umdih, ka rep ka riang, ka kam jngohkai pyrthei, ka pule puthi, ka koit ka khiah bad kiwei.
“Ka jingthmu ba nyngkong jong Sorkar Jylla ban kyntiew ka long ia ka shong suk shong shngaiñ, ki lad jingiada kiba paka, bad ka jingim kaba bha na ka bynta ki nongshong Shnong ka Jylla”
Ban pynkut ia ka jingkren, u Lat u la ong “kyrmen ba kine ki mat (points) ba nga wanrah kin treikam da ka jingbuh thong uwei pa uwei u Dkhot ban kyntiew ia ka Jylla”.