Mynta ka sngi (6/01/2024) ka Dorbar Shnong Khimusniang, Jowai kala rakhe ia ka lyngkhu jingdap 75 snem jong ka shnong bad mynta ka dei ka sngi kaba la plie sdang ia kane ka jingrakhe ka ban sa rakhe baroh shisnem lynter ia ka ba yn sa pynkut ha ka 31/12/2024.
Mynta ka sngi u Chief Forest Officer, ka JHADC uba ju bat teng ia ka kam Waheh Shnong jong ka Dorbar Shnong Khimusniang u ma F.W. Blah ula long u kongsan katba u ma J.K. Rymbai, President Synjuk Waheh Shnong Jowai u la long u Symbud Kongsan.
Ha kane ka sngi na ka liang ka DS Khimusniang kala khot sngewbha ruh ia baroh ki Waheh Shnong jong ka nongbah Jowai kiba don hapoh ka shatri jong ka Synjuk ki Waheh Shnong, Jowai ban iadon bynta bad sakhi lang ia kane ka jinglehkmen Platinum Jubilee nalor kiwei de kiba la shah khot sngewbha.
Ia ka jingialang la pyniaid da ki ar ngut ki khun jong ka shnong kiba kynthup ia u ma L. Lyngdoh bad kong R. Patlong.
Ha shwa ban sdang ia ka jingialang kala don ka jingpule Baibl bad ka jingduwai na u Pastor E. Nongpluh. La ioh ia ka jingkren pdiang na u ma J.M. Pohsngap. Ka jingkren lyngkot ia ka History jong ka shnong na u wei na ki rangbah jong ka shnong u ma N.K. Lamare uba dei ruh u Chairman jong ka Souvenir Committee.
Hadien kane la ioh ia ka jingkren na u Symbud Kongsan ma J.K. Rymbai bad na u Kongsan ma F.W. Blah. Na ka liang jong ki, kila pynpaw ia ka jingsngewkmen lem halor kane ka jinglah jong ka shnong ban jam sha une u maw mer ba 75 snem. Ki buh ruh ka jingkyntuh ia ki nongshong shnong ba don ka mynsiem jingiaieit bad jingiatylli, khnang ba yn lah shuh shuh ban ialam shakhmat ia ka shnong ha kine ki snem ban wan.
Na ka liang u Kongsan ula plie ruh ia u Maw sahnam (Tablet) jong ka shnong, katba u Symbud Kongsan u la plie pyrda ia ka dur (Mascot) kaba dei ka dak jong ka jingrakhe 75 snem ka shnong.
U Kongsan ula sam ruh ia ka khusnam jop sha ka samla Wansaka E. Hinge haka jingiakop shna dur Mascot.
Ha kane ka sngi la pynshit pynsyaid ia ka jingrakhe da ka jingiashim bynta jong ki khun jong ka shnong naduh ki samla haduh ki khynnah lyngba ki jingrwai bad ki jingshad.
La ioh ia ka jingot Cake Jubilee bad la duwai pynkyntang da u Pastor K. Syiemlieh.
Ia ki kyntien ai khublei la ai da u samla E. Suting uba dei u Secretary, Paltinum Jubilee cum Organizing Committee. U la pyntip ruh ba ha kine ki bnai ban wan kin sa don shibun kiwei pat ki prokram jingiakop bapher bapher kiba ka shnong kan pyniakhun, kumta u khot bad kyntu lang ia baroh ki khun jong ka shnong ban iashim bynta shitrhem.
Kum ka dak jong ka jingkmen kala don ruh ka jingpynher ia ki Dingkum, ka jingiadihsha bad jingiabam ja sngewbha hapoh ka Indoor Hall jong ka Shnong.
