Ka jingïalehkai phutbol jong ki khynnah skul ne ka ‘Inter School Subroto Cup Football Tournament- 2022’ bala pynïaid da ka ophis u District Sports Officer (DSO) West Jaiñtia Hills District, Jowai kala sdang ha ka sngi Balang ha madan Kiang Nangbah Stadium, Jowai.
Ha ka jingïalehkai sdang ha ka kyrdan Under-17 jong ki khynnah shynrang kila don haduh 6 tylli ki match, ha kaba ka Ialong Secondary School kala jop ïa ka Don Bosco Secondary School Mihmyntdu da 2-3 kol, ka Govt. Public School kala jop ïa ka Demthring Presbyterian SS da 1-0 kol, ka Nartiang Presbyterian HSS kala jop 3-0 kol ïa ka Police Public SS.
Ka Kiang Nangbah Govt. HS School kala jop da 1-0 kol ïa ka Archievers SS Ummulong, ka Govt. Boys HS School kala jop 2-1 kol ia ka Trangblang Govt. U.P School, katba ka North Liberty ka pynliem ïa ka Shangpung Govt. U.P School haduh 4-0 kol.
Ha kane ka lympung ïalehkai ba la pynbynta ha ki kyrdan jong ka Under-14 (boys) bad Under-17 (Boys) bad ka Under-17 (Girls), kiba don haduh 43 tylli ki skul napoh ka West Jaiñtia Hills District kiba la wan ïashim bynta.
