Ka Ophis jong ka District Mission Coordinator, SSA West Jaiñtia Hills naduh mynta ka sngi 6 tarik u Jylliew, 2025 kala sdang ïaka rukom ai jingïalehkai kumno ban ïada ïalade ne ka ‘Self-Defense Training’ na ka bynta ki khynnah kynthei ha ki san tylli ki skul ba kynthup ïa ka R.C. Eve Mihmyntdu UPS SSA, ka Panaliar SSA UPS, ka Thadlaboh Presbyterian UPS SSA, ka Q.C. Springside UPS bad ka Panaliar UPS SSA, Jowai.
Ha ka jingïalang plie ïa kane ka prokram ai jinghikai ‘Self-Defense Training’ kaba 3 bnai lynter, la ïoh ka jingkren pdiang da ka Baiahunlang Phawa, Asst. Teacher R.C. Eve Mihmyntdu, la ïoh ka jingkren shaphang ka Self-Defense Training na u Alan Niangti, President WJHKDA bad na ka Sam-I-Naki War Passah, Member WJHKDA, Jowai.
La ïoh ruh ka jingïathuh khana lyngkot shaphang ka thong jong kane ka prokram na da u ma S.D. Laloo, Community Mobilizer, SSA, katba ïa ki kyntien ai mynsiem ïa ki khynnah skul la ïoh na u Fr. H. Lamare, Parish Priest ka Jowai Diocese uba long ruh kum u kongsan.
Na ka liang ka Sam-I-naki War Passah kum kawei na ki dkhot ka WJHKDA kala wan ban ïashim bynta ha kane ka prokram da kaba ai jingbatai shaphang ka rukom ban ïada ïalade ‘Self-Defense’ kaba long kyrpang eh na ka bynta ki khynnah kynthei.
U Fr. H. Lamare haba ai jingkren ula kyntu kynpham ïa ki khynnah ba kin long kiba nang ban burom ïala ka akor ka burom bad ban long ki khynnah kiba pynleit jingmuh bha haka por ba shah hikai, khnang ba kane ka prokram kan long kaba jop bad kaba lah ban wanrah burom ïa ka skul bad ïa ka District hi baroh kawei.
Hashwa ban poi sha ka bynta kaba kut jong kane ka prokram ha ka jingïalam u Na oomankiwi War Passah, Instructor 2nd Dan Black belt bad u Ribeit O Pde, Instructor 1st Dan Black belt kala don ka jinghikai hapdeng ki dkhot ka WJHKDA bad ki khynnah skul halor ki sap ba tbit kum ki khynnah kynthei ki lah ban ïada pyrshah ïa ki briew kiba thmu ban shim kabu.
