Ka All Meghalaya SSA Non Teaching Staff Association mynta ka sngi Balang ka 31 tarik Naitung 2024 ka la pynlong da ka jingiakhih shong kyllian myngor, ban dawa na ka sorkar jylla ban kyntiew noh ia ka tulop na ka 25 sha ka 80 percent ka bai nong trei jong ki.
Ia kane ka jingiakhih shong kyllian myngor khlem sangeh la pynlong ha madan Malki, Shillong.
La sakhi ruh ba naduh ka dang step ki nongtrei ka All meghalaya SSA Non teaching Staff ki la wan poi da ki spah ngut, na kylleng ki District katei ka jaka, ban iasnohkti lang ha ka ban dawa na ka sorkar ban kyntiew noh ia ka tulop jong ki.
Kane ka rai ban shong iakhih mynta ka sngi, ka dei hadien ba ki nongialam ki la pynlong Ia ka jingialang ba heh ha madan Malki ha ka 24 tarik Naitung 2024.
Ha ka jingiakren bad ki lad pathai khubor ka kong Jennifer June Synrem kaba dei ka President jong kane ka kynhun ka la ong ba ka rai ban mih madan ka dei beit ban dawa na ka sorkar ban kyntiew noh ia ka tulop jong ki.
Ka kong Jennifer June Synrem ka la ong ruh ba mynta la 8 snem ka 25 percent ka neh beit khlem kyntiew, kumba ka long ka la pynpaw ba la khia palat Ia ki Nongtrei Non- teaching Staff ban pyndap pynbiang ki jongdonkam ha ïing ha sem namar mynta ka la kiew lut ki mar ki mata, bad kam iahap shuh ha ki por mynshwa bad mynta.
Haba khatduh ka la pyntip ba ka la ju pynsngew na ka por sha ka por sha ki bor ba halor kum ha u Education Minister hynrei ki shu mih beit tang ki jingkular khlem seisoh eiei na kata ka daw kim banse ban mih shakhmat ban pynlong ia kane ka jingiakhih shong kyllain myngor.
