Ka Jingïaseng ka K.J.P Synod Mihngi kaba Ar phew wei (21) kaba la long ha ka Balang Presbyterian Nangbah, West Jaintia Hills District kala sdang naduh mynta ka sngi 16 tarik bad ïa kane ka Jingïaseng yn pynkut ha ka sngi U Blei 19 tarik Lber, 2023.
Na ka liang ka Balang Presbyterian Nangbah lyngba u T.Bn. E.S. Shylla la pyntip ba ha ka sngi U Blei 19 tarik ka Jingïaseng paidbah ha ka por 10 shiteng mynstep u yn sam ïa ka ktien U Blei da u Rev. H.S. Dann, ha ka Jingïaseng por 1 baje shiteng nohphai sngi yn ai jingkren da u Rev. G.P.L. Gadew, katba ha ka Jingïaseng miet 7 baje u Nongkren ïa ka Subject Balang “Ka Balang ka Angkor U Blei ba neh den bad ba skhem”. (Hebru 6:19) da u Rev. (Dr) M.J. Hynñiewta.
La kyrpad ïa ki paid riewngeit ki ban wan sha kane ka Jingïaseng Synod na ka liang ka Balang kala pynkhreh ïa ki jaka pynïeng kali kiba long kumne kiba wan na Soomer – Nangbah kin pynïeng ha Madan Iarain, ba wan na Mukhla – Nangbah kin ïeng ha Madan Lum Bangla, kiba wan na Nartiang – Nangbah kin pynïeng ha Madan Lum Bangla, katba kiba wan na Kyndong Tuber – Nangbah kin pynïeng ha Madan Balang bad ha madan ïadaw rong ka shnong Nangbah.
Ha ka juh ka por ka Balang ka buh ka jingkyntu ïa baroh ki kali kiba wan sha ka Jingïaseng ba kin ym pynïaid stet ne ban shim pass kulmar khnang ban lait na kino kino ki jingjia ba sngewsih. La kyrpad ïa ki kali ba wan Jingïaseng kin kohnguh ban ïaid la ka jong ka side khnang ban suk ka rukom pynïaid kali bad ban lait na ka dheng kali.
La pyntip ba yn ym don dukan ja bad sha, sha ki bynta ki rud surok ne hapoh parking, lait tang kiba die mar bam ne khutia mutia ba ka Balang ka la pynbeit ba kin shong hapoh ki parking da kaba kin ïa sngewthuh jingmut bad ki Volunteer Traffic.