Ka Jingïaseng Samla Balang Presbyterian Mustem, West Jaiñtia Hills District ha kane ka 23 tarik u Ïaïong kala sdang ïa ka jingrakhe lehkmen jong ka jingdap 75 snem ne (Platinum Jubilee) shi bynta naka jingshakri sha ki para samla ka Balang lyngba ki prokram bapher bapher.
Ka phang jong kane ka jingrakhe kaba ong “U Khrist ha phi ka jingkyrmen ka burom” ïa kaba la pynshong nongrim na ka Kolossai 1:27 bad ïa kane ka bynta la kren da u Rev. E. Nongpluh ha ka sngi ba plie ïaka Jubilee.
Kum ka dak jong ka jingsah kynmaw la plie ruh ïa u Mot Jubilee da u Moderator Jowai Presbytery TBn. O.B. Huwa, ka jingpyllait ïa ki Momento da u TBn. M.L Pyrtuh bad ka jingpynher ïa ka lama Jubilee da u TBn. H.Shylla uba dei u Chairman jong ka Balang.
U pastor E. Nongpluh haba kren halor kane ka phang Jubilee ula pynsngew ba ka don ar bynta kata ka jingkyrmen bad ka burom, u ong ka jingkyrmen ka dei kaba kordor haka jingim ïa kaba ai da U Blei, kum ki briew kiba ïaidlynti ha sla ka pyrthei ki dei ban don ka jingkyrmen kaba kynja mynsiem tad haduh ban ïoh ïa ka jingim bymjukut. Ka burom pat ka pynpaw ïa ka bor jong u Blei bad kajingkhuid u Blei, ula kren ruh shaphang ka burom u Blei lyngba ka mariang, ki sawdong sawkun bad ki jingpynlong, shuh shuh ula ïathuh ïa ka burom lyngba ukhun ba marwei u Blei, u Jisu Khrist uba la wan pynpaw ïa ka burom jong ka jingkular, ka jingieit bad ka jingmap ei. Ula khot ïa ki khun samla ka Balang ban pynkyntang ïalade halorkane ka phang kaba khraw bad kaba kordor da kaba ong “To ngin rakhe ïa kane ka Jubilee da ka jingim ba kynja mynsiem, khnang ban ïoh ïa ka jingpyllait, kajingmap ei bad ka jingsuk kaba dawa ban ïoh mad ïaka jingkyrmen haka burom bathymmai, khnang ban pynjianai shuh shuh haka jingshakri ïa U Blei”.
Ha kane ka sngi la ïoh ruh ka jingrwai kyrpang na ka Standing Choir jong ka Jingïaseng Samla Balang Presbyterian Mustem ïa kane ka jingrakhe yn pynkut haduh u bnai Nohprah mynta ka snem.
