Ka Loompyrdi Iongpiah Upper Primary School, Jowai ha kane ka sngi saitjaiñ kala sdang ïa ka jingrakhe lehkmen dap 25 snem jong ka jingshakri ïaka jingnang jingstad ïa ki khynnah skul, ïa ka jingïalang bala pynlong ha Madan Myngkoi Pyrdi, Iongpiah, Jowai bad ïa kane ka jinglehkmen yn rakhe ha baroh shisnem.
Ha kane ka sngi la wan ban sakhi da ka kong M. Lakiang, District Mission Coordinator, SSA West Jaiñtia Hills kum ka kongsan, u ma C. Tympang Laloo, Chairman SMC uba la ai ki kyntien pdiang sngewbha, ka jingnguh Blei da ka Riianom Passah, Member SMC, u ma Hercules Toi, Founder Secretary uba la pynsngew shaphang ka jingïaid lynti jong ka skul naduh kaba sdang jong u snem 2000 bad ki kam kiba ka skul kan leh ha kine ki snem ban wan, ka jingkren naka Neetu Shullai, Headteacher Loompyrdi Iongpiah UPS SSA, na u Waheh Chnong ka Loompyrdi Iongpiah ma R.L. Bimee Suwer, nalor ka jingdonlang ki dkhot ka School Managing Committee, ki khynnah skur bad kiwei de.
Na ka liang ka kongsan ka kong Lakiang haka jingkren kala ïaroh ïa kane ka skul kaba la kiew shakhmat katba dang mih ki sngi, ha kaba la sakhi ïa ki jingrung skul jong ki khynnah, kumjuh ruh ka rukom ai jinghikai ha baroh ki liang jong ka jingdonkam bad khamtam kala ïaroh ïa ka jingtrei shitom bad ka sap hikai jong ki nonghikai jong kane ka skul.
Shuh shuh kala pynsngew ha kaba ïadei bad kane ka skul na ka liang ka ophis SSA ha kine ki snem bala dep kala ïarap ïa kane ka skul naduh ki kamra klas, ki jaka leit bar, ki Uniform, ki kot nalor kiwei de. Kala ong kane ka jingdap 25 snem jong ka skul kam dei tang ka jingïaid lynti hynrei ka buh ka jingkyrmen skhem ba ka skul ka dang ïaid shakhmat ban ai jinghikai khambha ha kine ki sngi ban wan.
pHa kane ka sngi ka kong Lakiang kala ai jingïarap haduh 25 hajar tyngka ïa ka skul.Ha kane ka sngi la plie paidbah kumjuh ïa u Mascot jong kane ka jingdap 25 snem ka skul daka kongsan bad ka jingpynher ïa ka dingkum, la pynphuh shuh shuh da ki jingrwai na ki nonghikai, ki jingshad na ki khynnah skul bad ka jingsam ïa ka khusnam sha ki nongjop haka jingïakop dor dur, katba ïa ki kyntien ai khublei la ïoh na u C.A. Ram Kyndiah Secretary SMC.
