Ka jingkhot pakhang surok jong ka JAC Dong Namchiang ha Narpuh ka la sdang naduh hynne mynstep ha ka por 7:30 mynstep ha kaba ki paidbah nongshong shnong kiba na ka shnong Tongseng, Kuliang, Pyrtakuna, Umkiang, Donaskur, Donaumbluh, Ratacherra bad Malidor ki la mih ha surok bad khanglad ïa baroh ki kali kiba dei iaid lyngba kane ka surok National Highway (NH-6).
Katto katne ki rangbah bad nongïalam shnong ba kynthup ïa u Waheh Shong barim jong ka Pyrtakuna, u bah William Shylla, u Secretary Shnong Umkiang u bah Nicholas Lyngdoh, ka President ka VPP, Narpuh Circle ka kong Deiwi Tongper ki la pynpaw ba lada ka sorkar kam sngap bad kam shimkhia ïa kane ka kam ban pynbha noh ïa kane ka surok, ka jingpakhang surok kan dang ïai bteng beit kumba la rai da ka JAC.
Kine ki rangbah kila pynpaw ruh ba la bunsien bunsien ngi kila kyrpad ïa ka sorkar, da kaba pynkynmaw ba don ki khep ki khep ba ki longkmie ba armet kim ju lah satia ban poi sha ka jaka sumar ha ka por kaba biang la ka da dei sha Assam ne sha Jowai, kumjuh ki nongpang tang na ka daw jong ka jinglong jingman jong kane ka surok. Kumta da ka jingryntih baroh ki nongshong shnong ki la mih paidbah ban shimbynta ha kane ka pakhang surok, kaba kim tip la kan dei tang shi taiew ne shi bnai, hynrei kan bteng tat haduh ba ka sorkar kan da shim ïa ka kam ban shna noh shna ïa kane ka surok, kila la ong.
Ha kane ka jingpakhang surok jong ka JAC la wan ban ai jingkyrshan lang da ki kynhun sengbhalang bapher kum ka Jaintia National Council (NYC), ka Hynniewtrep Youth Council (HYC) Narpuh Circle, ka seng saiñ hima ka Voice of the People Party (VPP), Narpuh Circle bad kiwei.
