Shi bynta na ka prokram ‘Viksit Krishi Sankalp Abhiyan’ ha ryngkat ka jingïatreilang bad ka tnad Indian Council of Agriculture Research (ICAR), mynta ka sngi 29 tarik u Jymmang la sdang ïa ka jingai jinghikai ïaki nongrep ka ban kut haduh ka 12 tarik u Jylliew 2025, ïa kane la pynlong ha ki 700 tylli ki District jong ka Ri India.
Ha West Jaiñtia Hills District mynta ka sngi la plie ïa kane ka prokram bala pynlong daka Krishi Vigyan Kendra, Jaiñtia Hills, Moopun Wahiajer haka jingïalang bala pynlong ha phyllaw jong katei ka ophis ha Wahiajer, West Jaiñtia Hills District.
Hapoh kine ki sngi jong ka prokram ki stad saian (Scientist) kynthup lang ïa ki ophisar bad ki nongtrei na ka tnad ka rep ka riang ki leit mih sha manla ki shnong jong kitei ki District ban ïoh ïathir markhmat bad ki nongrep ha ryngkat ki lad jingbatai ban khambniah.
Ïa kane ka rukom ai jinghikai la bthah da u Myntri Rangbah duh ka Ri u Narendra Modi kum ka lad ban pynbha ïa ka rep ka riang katkum ki lad jingtip kiba thymmai, na ka bynta ban pynlong ïa kawei ka ri, kawei ka kam rep bad kawei ka kynhun.
Yn leit pynsngewthuh ïa ki nongrep halor ka rukom pyndonkam ïa ki dawai (fertilizer) ban thung jingthung na ka bynta ka jingbha ka khyndew. Kumjuh ruh ka jingpyndonkam ïa ki Drone haka rep ka riang ki ban ai jinghikai da ki briew ka KVKs, ICAR bad IFFCO bad kiwei de.
La ïathuh ba kane ka kam ka long shi bynta ban pynkiew ïa ka rep ka riang hapoh ka ri bad kane ka ïarap ïa ka lashai ban wan hadien ka 10-20 snem ban wan.
Ka kongsan kong J. Lyngdoh kaba dei ka Director jong ka tnad Agriculture ka sorkar jylla haba ai jingkren, kala ong kane ka prokram kan ïarap shibun eh ïa ki nongrep ba kin sngewthuh ïa ka kam rep katkum ka juk stad ba mynta, da kaba ym donkam shuh ban pynlut ïa ka bor met, hynrei ka sorkar kan ïarap ban ai jinghikai kumno ban pyndonkam ïa ki tiar rep (machine).
Shuh shuh kala ong ka don ka skim na ka bynta ban thied ïa ki tiar rep kum ka (power trailer) ha ka subsidy kaba rit kaba pynsuk ïa ki nongrep ban siew ïa ka ram, kumjuh ruh ban pynïoh ïa ki symbai, ki tiar pynkhuid ñiut, nalor ka rukom shim ram na ki Bank bad kiwei de.
Kala kyntu ïa baroh ki nongrep ka District ba kin sngewbha ban shim ïa kane ka kabu kaba long ka lad jingtip na kane ka prokram ‘Viksit Krishi Sankalp Abhiyan’
Ïa ka jingïalang ha kane ka sngi la pynïaid da ka Dr. Alethea Dympep, la ïoh ka jingkren pdiang na ka kong L.L. Challam, Senior Scientist & Head, ka jingkren na ki ophisar bapher bapher, katba ïa ki kyntien ai khublei la ïoh na ka kong Jeseama Marak, SMS Fisheries.
Ha kane ka sngi da ki spah ngut ki nongrep ka thaiñ kila wan poi sha kane ka jingïalang bad hadien kane ka jingïalang la ïoh ka jingïaphylliew jingmut lang hapdeng ki nongrep, ki Scientist bad ki nongtrei ba peit ïa ka rep ka riang.
