Ka Shnong Panaliar Jowai mynta ka sngi 25/12/2024 kala sdang ia ka taiew lehkmen kaba long kum ka dak ban ai khublei ia u snem ba rim bad ia kane ka prokram yn pynkut ha ka 1/01/2025 kaba dei ka sngi ban pdiang ia u snem uba thymmai.
Ka phang pdeng jong kane ka jinglehkmen ka dei “Ka SAP – Ka Luti Ya Ka Mûnried”. Mynta ka sngi kala don ka jingialang kaba lyngkot ba la pyniaid da ka Leda Sumer kaba dei ka Chairperson jong ka Seng Kynthei bad la ioh ia ki kyntien ai khublei na ka Secretary jong ka Seng Kynthei.
Ia kane ka prokram lehkmen la wan ban plie da u Khroobok Passah, Additional Director, Sports & Youth Affairs, Government of Meghalaya kum u kongsan.
La don ka jingnguhblei na u Marki Lakadong u President ka Khynroo Khyllood Welfare Organisation
La ioh ia ka jingkren na u Waheh Shnong ma Riquoma Rq. Laloo uba la ong ba kane ka taiew lehkmen ka long kum ka jingplielad ia ki khun jong ka shnong ban pyni ia ki sap ki phong ba ki don. U la kyntu ruh ia baroh ki khun jong ka shnong Panaliar ba kin wan ban iashim bynta naduh ba sdang haduh ban da kut jong kane ka jinglehkmen.
Na ka liang jong u Kongsan ma Passah ula iaroh ia ki jinglah jong ka shnong ba pynlong ia kum kine ki jait prokram ki ba yn ju kham don satia ba pynlong. ula iathuh ruh ba ka District kan sa pdiang ia ka Meghalaya Games kumta u kyntu ia ki nongshong shnong ka Shnong Panaliar ba kin sngewbha ban iasnoh kti lang na ka bynta ban don ka mynsiem pdiang burom ia baroh kiba wan shapoh ka District.
U la kyntu ruh ia baroh ki nongshong shnong ka Panaliar ba kin long kiba iatylli ha baroh ki liang bad ban don ia ka mynsiem iatreilang ha kino kino ki bynta.
Kum ka jingsdang na ka liang ki khynnah rit kila ioh ban iashim bynta ha ka Kids Fashion Show, ka jingiakop shad bad kiwei. Naduh lashai 26/12/24 ki prokram kin sdang naduh ka por 10:00 AM.
Kane ka long katkum ka jingpyllait khubor na ka kong Biangtre Bamon, Executive Members ka Shnong.
