Ka sorkar jylla lyngba ka Meghalaya State Skill Development Society (MSSDS) kaba hap hapoh ka Labour Department kala sdang ïa ka program kaba ai kyrteng ka Skill Meghalaya. Ka thong jong kane ka program kaba san snem ka long ban ai jinghikai haduh shilak ngut ki samla ha ki sap trei kiba pher bapher. Ha kane ka snem ka sorkar kala don ka jingthmu ban ai jinghikai haduh 20,000 ngut ki samla ha baroh kawei ka jylla.
Mynta ka sngi ka Society of Urban and Rural Empowerment (SURE) kaba long ka seng kaba la empanelled da ka MSSDS ban long kum kawei na ka Skill Training Provider (STP) hapoh ka jylla kala sdang ïa ka training ha ka lañ Integrated Farming haka shnong ïalong. Kane ka dei ka sien kaba nyngkong ba ka Skill Meghalaya kan pynlong ïa ka training hapoh ka West Jañtia Hills Distrik.
Ka training halor ka Integrated Farming kala buh ïaka shnong Ïalong haka kyrdan kaba kyrpang kum ka shnong kaba nyngkong ha kaba kum kane ka training la pynlong na kane ka projek. Haba kren lamkhmat haka jingïalang ban plie ïa kane ka training u Dr. H.H. Mohrmen u la iathuh ia ki kam ba ka seng ka la trei kum ka FOCUS, ka Link Workers Scheme bad kiwei kiwei. Ula ong ruh ba ha kaba ïadei bad ka Integrated Farming ka Seng kala pynlong mynshuwa ïa kaba kum kane ka training ïa kaba la bei pisa da ka Asian Development ha ki lai tylli ki shnong, ka Wahïajer, ka Ksehrynchang bad Moosakhia.
Haka jingkren pdiang sngewbha ia ki nong ia shim bynta baroh ha kane ka training na u ma T. Ram Phawa u ba long u Waheh Shnong jong ka shnong Ialong u ai ka jingiaroh ia ka SURE ba ka la lah ban wan rah ia kum kane ka training khnang ba ki nongshong shnong kin lah ban pynheh bad pynjanai ia ka jingtrei kam ki. U la ban jur ruh ia ki Self Help Group (SHG), ki Village Organisation (VO) bad ki Producer Groups (PG) ba kin trei bha khnang ba kin lah ban plie biang ia ka iew rud surok (lay bye market) kaba don harud ka surok bah haka shnong Ïalong. U la kyntu ruh ia ki nong shah training ba kin ym dei ban pep ia ka training khnang ba kin ioh lut baroh ki jait training.
Ha kane ka jingialang la ioh ruh ia ka jingkren na u Lambor Suchen u ba dei u Skill Development Officer na ka office Meghalaya State Skill Development Society(MSSDS). U ma Suchen ula ïathuh shaphang kiba bun ki jait training kiba la pyntreikam da ka MSSDC ïa kiba la ïarap pyntreikam da ki seng treimon sngewbha kum ka SURE. Namar ba ka shnong ïalong ka don haruh ka surok bah bad ba ka don ka Tourist spot ha kane ka shnong, ula kyntu ruh ba ki nongshim training ba kin shimkhia ïa ka training khnang ba kin lah ban pynmih ïa ki mar kiba ki lah ban die ha kine ki jaka.
Ïa ki kyntien ai khublei la ai da ka kong Sngi Dhar kaba long ka President jong ka VO jong ka shnong Ïalong.