![](https://i0.wp.com/yutipnews.com/wp-content/uploads/2024/07/WhatsApp-Image-2024-07-15-at-10.18.56-PM.jpeg?resize=640%2C394&ssl=1)
Mynta ka sngi ka 15 u Naitung 2024 ka office trei kam ka Tribal and Rural Social Foundation (TRSF) ka la plie ia ka jaka hikai suh jaiñ Self Employ Tailoring ha ka shnong Namdong B kaba don ha West Jaiñtia Hills.
Ia kane ka jaka ai jinghikai training la bei tyngka da ka tnad treikam ka Meghalaya State Skills Development Society (MSSDS) hapoh ka jingialam jong ka sorkar. La pyntrei kam ia kane ka skhim Skills Meghalaya ha kylleng ki jaka kiba don hapoh ka jylla ha ki jinghikai ki bapher bapher.
La plie ia kane ka jaka hikai da u Dr.H Niang, BDO, ka Namdong Community and Rural Development Block C&RD ha ryngkat ka jingiadon lang u State District Officer SDO ka Skill Meghalaya Jowai u L. Suchen, ka kong Y. Kyndait na ka ophis ka District Social Welfare Officer DSWO, Jowai kaba long ruh ka Gender Specialization GS bad ki rangbah shnong ka shnong Namdong A, Moobakhon, bad ka shnong Nongmulieh.
Ha ba ai jingkren ha kane ka sngi, u Dr. Niang u la ong ban shah hikai ha ki kam suh jaiñ ba ha kine ki sngi mynta ki briew ki duna bha ban phah suh ia ki jaiñ ki sopti jong ki sha ki dukan namar ki briew mynta ki la sngewtynnad ban thied ia ki jaiñ ba la dep suh lypa (readymade) u la kyntu ruh ia ki da kaba ong ba ki dei ban long kiba trei shitom bad pylleit jingmut ha kane ka jinghikai kaba 3 bnai khnang ba la shai la shi sngi kan long ka jingmyntoi ia ki bad ia ka shong ka thaw baroh da kaba ki lah hi ban pynmih ki jaiñ ki sopti (readymade) kumba leh kiwei ha dien ba ki la dep shah hikai bad pyntbit
Na ka liang u SDO u L. Suchen u la ong ba ka sorkar mynta lyngba kane ka skhim Skills Meghalaya shibun ki samla ki ioh jingmyntoi lyngba ka jinghikai ia ki skills ki bapher bapher ha kylleng ki jaka hapoh ka jylla kum shi bynta kane ka long ban iarap ia ki khynnah samla wat kam wat jam namar ba ha kine ki sngi mynta ban ioh ki kam sorkar kam long kaba suk namar kata ka sorkar lyngba ka ne ka skhim ka khmih lynti ba kan long ka lad jingiarap ban ioh kam lane ban seng kam la jong.
Shuh shuh u la ong ruh ha dien ba kila dep pyndep ia ki jingshah hikai ka sorkar kan sa iarap ruh ban pynbiang ia ki tiar ki tar kiba donkam. Ha kaba pynkut iaka jingkren u la pynsngew ba ka ophis trei kam ka Skills Meghalaya ka iarap ruh ia ki khynnah pule General Nursing and Midwifery GNM, Auxiliary Nursing Midwifery ANM ban pynioh kam ia ki sha kiwei pat ki ri ka pyrthei kum sha Japan, Malaysia bad ha ki wei ki wei de ki ri jong ka pyrthei. Ban tip kham bniah u la ong wan mih shapoh ka office trei kam ka Skills Meghalaya ha Jowai kaba don ha ka ophis treikam u Deputy Commissioner ha ka mala kaba ha jrong duh.
Ka kong Y. Kyndait Gender Specialization ka ophis treikam ka DSWO Jowai ha ka jingkren ka la pynsngew sha ki nong shah hikai ha kaba ia dei bad ki khynah kynthei naduh kiba dang khynnah haduh ki ba la rangbah. Ka tnat trei kam jong ka Social Welfare ka ai ia ka lad jingiarap bad ka jingiada sha ki kynthei ban lait na ka jingshah leh donbor bad thombor ha ki riew shim kabu. Ka la ai khublei ruh ba lyngba kane ka jinghikai kan iarap ia ki ba bun ki kynthei samla kin ioh jingmyntoi lyngba kane ka jinghikai ha dien ba ki la dep ban pyndep.
![](https://i0.wp.com/yutipnews.com/wp-content/uploads/2024/07/WhatsApp-Image-2024-07-15-at-10.18.58-PM-1024x580.jpeg?resize=640%2C363&ssl=1)
![](https://i0.wp.com/yutipnews.com/wp-content/uploads/2024/07/WhatsApp-Image-2024-07-15-at-10.18.59-PM-1024x580.jpeg?resize=640%2C363&ssl=1)