Ka Sailynter Fish Sanctuary ka long ka Sanctuary kaba nongkong eh hapoh East Jaintia Hills District, ia kaba la plie paidbah ha ka 5th December, 2019 da u bah F. M. Dopth, DC ka EJHD ha kata ka por, lyngba ka jingmynjur lang ka Dorbar shnong Umlyngsha haba mynta ka la paw shai ba ki dohkha dohum kiba don ha kane ka pung ki la kharoi sted bha, la iathuh u samla Namphrangmi Talang, Waheh Shnong,
U ma Talang u la ong shuh shuh ha ki por mynshwa katba ka shnong kam pat mynjur ban pynlong Fish Sanctuary ia kane jaka te ki dohkha ki don hi hynrei ym shym la long kumba long mynta namar ki dohkha ki la bun bha.
Kumta ngi kyntu ia ka sorkar jylla khamtam ia ki bor District jong ka East Jaintia Hills na ka bynta ban pynlong ia kane ka jaka ri dohkha kum ka Aqua Park ha poh ka District.
Nalorkata, ka shnong ka kyrpad ruh ia ka sorkar lyngba ki bor synshar District na ka bynta ban pynioh ia ki jingdonkam kum ki Footpath, ka Jingkieng iaidkjat, ki jaka shongkai pynngad, ki lieng kynda (Boat), ki jaka leit shabar (Public Toilet) ban buh ha kane ka Fish Sanctuary khnang ban khring ia ki riew jngohkai pyrthei khamtam ia ki riew ieit dohkha.
Kane ka Wah Sailynter ka don haduh saw tylli ki thyllong wah (Source) kiba hap ha kane ka thwei kynthup ka wah Umpyrjaw, Wahsiej, Wah Umpliang, Wah Ratap bad kiwei de ki wah duid.
