Ki jakhlia ba bun jait kiba mih na ki bynta jong ka Iawmusiang kiba don ha khmat ka ophis treikam jong u Deputy Commissioner West Jaintia Hills District kila sdang ban kylla lum rit bad saphriang ruh kylleng, hadien ba ki nongtrei jong ka JMB kim iohlad satia ban kit ne leit bret ia kine ki jakhlia na ka daw jong ka jingpyrshah jong ki katto katne ki sengbhalang bad ki riew paidbah ki sawshnong.
Kum kine ki jakhlia kila sdang ban dap biang sa shisien ha kiwei pat ki bynta bala juh pyllang ia ki kum ha Lad Thomas Jones College bad sha Iawthymme ba don ha Ladthalaboh.
Dang shen u Chairman jong ka Jowai Municipal Board u ma F. War ula dep ban ai da ka FIR sha u SP ka West Jaintia Hills hadien ka jingshah pynphai ki kali ka JMB bad da ka jingthmu ban ai ka jingsynran ia ki kali jong ka Municipal haba ki leit bret ia kitei ki jakhlia ha ka jaka ba la dep ban jied da ka sorkar, hynrei imat katei ka jingujor jong utei u Chairman kam shym la treikam satia.
Utei u Chairman ula ai jingtip ruh mar mar sha u Deputy Commissioner ka West Jaintia Hills hadien ba katto katne ki kynhun kila pynphai ia ki kali ka JMB ha ka 7 tarik mynta u bnai.
Katkum ka jingiathuh jong u Chairman ka JMB la ong ba kiba bun ki nongshong shnong jong ki saw shnong ba kynthup ia ki Thadmusem, Larnai, Nongkhroh bad Sohphoh kila pdiang ia kane ha dien ba kala don ka jingpynsngewthuh paidbah kaba shai na ka liang jong ka JMB ha kine ki por kiba la dep, hynrei ki don tang katto katne ngut ki kynhun kiba iai pyrshah ia kane u la ong.